बुटवल—कोरोना भाइरस (कोभिड—१९) बाट मृत्यु भएका बाँकेको नरैनापुर गाउँपालिकाका २५ वर्षीय युवाको एम्बुलेन्स खोज्दाखोज्दैं मृत्यु भएको गाउँपालिका अध्यक्ष इश्तीयाक अहमद शाहले बताएका छन् । भारतको मुम्बईबाट आएका उनलाई गाउँपालिकाको दीपेन्द्र मावि भोजभगवानपुरस्थित क्वारेन्टाइनमा राखिएको थियो ।
३० बैशाखमा बाँके आइपुगेका उनको दुई साताको यात्राका कारण खुट्टा सुन्निएका थिए । शनिबार राति उनलाई एक्कासी ज्वरो आएपछि अस्पताल लैजान एम्बुलेन्सको बन्दोबस्ती गर्दागर्दै मृत्यु भएको थियो ।
गाउँपालिका अध्यक्ष शाहले एम्बुलेन्स खोज्दाखोज्दै उनको मृत्यु भएको बताए । ‘उनलाई कुनै दीर्घ रोग भएको मलाई थाहा छैन । हिजो राति एक्कासी ज्वरो आयो । बान्ता पनि गरेका रहेछन्,’ अध्यक्ष शाहले भने, ‘हामीले एम्बुलेन्सको व्यवस्था गर्दागर्दै उनको ज्यान गयो ।’
शनिबार नै उनको पीसीआर जाँचका लागि स्वाब संकलन भएपनि आइतबार रिपोर्ट कोरोना पोजेटिभ आएको छ । उनी प्रदेश पाँचमा कोरोनाबाट मृत्यु हुने पहिलो व्यक्ति हुन् । प्रदेश नम्बर पाँचका सामाजिक विकास मन्त्रालयका सचिव गोपी खनालले शवको दाह संस्कारका लागि तयारी भइरहेको बताए ।
बाँकेमा हालसम्म कोरोना संक्रमितको संख्या ३३ पुगेको छ । बाँकेको कोरोना अस्पताल बिरामीले भरिएपछि २ दिन अगाडिदेखि नै नरैनापुर गाउँपालिका ८ संक्रमितलाई बेलझुण्डीस्थित कोरोना अस्पतालमा लगिएको छ । प्रदेश नम्बर पाँचमा १ सय ५ जनामा संक्रमण र १ जनाको मृत्यु भएको छ ।
