बुटवल—मानव स्वास्थ्यलाई हितकर हुने अर्गानिक कृषि उत्पादनलाई प्रवर्द्धन गर्न रुपन्देहीको तिलोत्तमा नगरपालिका—८, चारनम्बरमा हाटबजार सञ्चालनमा आएको छ । योगलक्ष्मी एग्रो प्रालिले तिलोत्तमा नगरपालिकासँगको सार्वजनिक निजी साझेदारी (थ्रीपी) मोडलमा हाटबजार सञ्चालनमा ल्याएको हो ।
निजी जग्गामा सञ्चालित हाटबजारको शनिबार आयोजित कार्यक्रमबीच तिलोत्तमा नगर प्रमुख वासुदेव घिमिरेले उद्घाटन गरे । स्थानीय अर्गानिक कृषि उत्पादनको बजारीकरणमा टेवा पु¥याउने उद्देश्यले हाटबजार सञ्चालनमा ल्याइएको प्रालिका सञ्चालक दीपेन्द्र अधिकारीले जानकारी दिए । झण्डै एक वर्षदेखि परीक्षणको रुपमा सञ्चालन गरिएको हाटबजार औपचारिक रुपमा शनिबार उद्घाटन गरिएको हो ।
हाल शनिबार र बुधबार लाग्ने हाटबजारलाई समयक्रमसँगै नियमित रुपमा सञ्चालन गरिने उनले बताए । प्रालिले कृषिजन्य सामाग्रीको उत्पादन, संकलन, भण्डारण, प्रशोधन गर्ने लक्ष्य निर्धारण गरेको छ । पहिलो चरणमा हाटबजार सञ्चालनमा ल्याइएकोमा लगानी विस्तारसँगै अन्य पूर्वाधार र सेवा–सुविधा थपिने व्यवस्थापक विष्णुमाया भुसालले बताइन् ।
हाटबजार उद्घाटन कार्यक्रममा नगर प्रमुख घिमिरेले अर्गानिक कृषि उत्पादनको बजारीकरणमा हाटबजारले टेवा पु¥याउने उल्लेख गर्दै बिक्री गरिने वस्तुको गुणस्तरलाई ख्याल गर्न आग्रह गरे । हाटबजारमा व्यवसायीले गरेको फोहोर व्यवस्थापन गर्ने जिम्मेवारी व्यवसायीको नै हुने भन्दै उनले शुन्य पोलिथिन अभियानको मर्मअनुसार फोहोर व्यवस्थापन हुनुपर्नेमा जोड दिए ।
नेकपाका युवा नेता यज्ञ गैरेले समाजलाई पनि फाइदा पुग्नेगरी हाटबजार सञ्चालन गरेकोमा कम्पनी सञ्चालकप्रति आभार व्यक्त गर्दै हाटबजारले चार नम्बरलाई थप गुल्जार बनाउने विश्वास व्यक्त गरे । वडाध्यक्ष कृष्णप्रसाद पौडेलले हाटबजारले उपभोक्ता र बिक्रेता दुवैलाई लाभ पु¥याएको बताए । कार्यक्रममा नेपाली कांग्रेसका नगर सभापति हरिलाल पाण्डेय, राममणि क्याम्पसका पूर्व क्याम्पस प्रमुख मोहनराज शर्मालगायतले बोलेका थिए ।
