चरिकोट—दोलखाको भीमेश्वर नगरपालिका–२ दोलखामा रहेको धुलिखेल दोलखा अस्पतालमा इन्डोस्कोपी सेवा सञ्चालनमा ल्याइएको छ । इन्डोस्कोपी सेवाको शुभारम्भ भीमेश्वर नगरपालिकाका नगरप्रमुख ईश्वर नारायण मानन्धरले गरेका हुन् ।
सो अवसरमा नगरप्रमुख ईश्वर नारायण मानन्धरले धुलिखेल दोलखा अस्पतालले दोलखालगायत छिमेकी जिल्लाका नागरिकहरुलाई समेत गुणस्तरीय सेवा दिदैं आएको र आगामी दिनमा इन्डोस्कोपी सेवा सञ्चालनमा आएपछि अझ उपचारमा थप गुणस्तरीयता कायम हुने अपेक्षा लिएको बताए ।
नगरप्रमुख मानन्धरले दोलखाली नागरिकले अस्पतालबाट सर्वसुलभ शुल्कमा इन्डोस्कोपी सेवा लिन सक्ने वातावरण बनाउन अस्पताल प्रशासनलाई आग्रहसमेत गरे । नगरप्रमुख मानन्धरले इन्डोस्कोपी सेवाले दुर्गमका जनतालाई उपचारको लागि काठमाडौं जानुपर्ने बाध्यता हट्ने विश्वास लिएको बताए ।
धुलिखेल दोलखा अस्पतालका प्रशासन प्रमुख डा. दिपेश ताम्राकारको सभापतित्वमा सम्पन्न इन्डोस्कोपी सेवा शुभारम्भ कार्यक्रममा भीमेश्वर नगरपालिकाका उपप्रमुख कमला बस्नेत, वडा नम्बर– २ का वडाअध्यक्ष स्टालीन श्रेष्ठ लगायतले मन्तव्य व्यक्त गरेका थिए ।
इन्डोस्कोपी सेवाले ग्यास्ट्राइटिस, डुओडेनाइटिस, पेप्टिक अल्सर, पेप्टिक अल्सर रक्तस्राव, एचपाइलोरी संक्रमण, रक्तस्राव, ग्यास्ट्रिक क्यान्सरलगायत धेरै रोगहरुको पहिचानपछि उपचारमा सहज हुने डा. ताम्राकारले बताए ।
