मेलम्ची स्वास्थ्य शिविरमा ३९७ जना लाभान्वित

काठमाडौं—सिन्धुपाल्चोक जिल्ला मेलम्ची नगरपालिका—८, क्यौरानीस्थित जलवाई देवी माविमा आयोजना गरिएको एक दिने स्वास्थ्य शिविरबाट ३ सय ९७ जना लाभान्वित भएका छन्। शिविरमा सामान्य चिकित्सा, बालरोग, आँखा रोग, स्त्री तथा प्रसुती सेवा, मधुमेह परीक्षण, इसीजी सेवालगायतका सेवा दिइएको थियो ।

शिविरमा १४ महिनाको बालिकादेखि १ सय २ वर्षका वृद्धसम्मको स्वास्थ्य उपचार गरी आवश्यक परामर्श दिइएको थियो । आवश्यक भएकाहरूलाई निःशुल्क चश्मासमेत वितरण गरिएको थियो ।

कोइराला मेडिकल हल जोरपाटी काठमाडौं, स्वर्णिम स्वास्थ्य नेपाल मूलपानी काठमाडौंको संयुक्त आयोजना र शंकरापुर अस्पताल प्रालिको प्राविधिक सहयोगमा शिविर आयोजना गरिएको हो ।

यसअघि शिविरको उद्घाटन गर्दै नगरप्रमुख आइतमान तामाङले विपन्नलाई सेवा दिने लक्ष्य सहित शिविर आयोजना गर्नेप्रति आभार व्यक्त गरे ।

स्वागत मन्तव्य राख्दै विद्यालय व्यवस्थापन समितिका अध्यक्ष एवं शिविर स्वयंसेवक समन्वय समितिका संयोजक जलबहादुर दोङले आगामी दिनमा पनि यस्तो शिविरले निरन्तरता पाउने विश्वास व्यक्त गरे ।

शंकरापुर अस्पतालका निर्देशक डा. रमेश ढकालले आगामी दिनमा मेलम्ची नगरपालिका र शंकरापुर अस्पतालबीच सहकार्य गरी मेलम्चीवासीलाई गुणस्तरीय स्वास्थ्य सेवा दिइने जानकारी दिए ।

हेल्थ कन्सर्नका सिईओ डा. सुवास प्याकुरेलले हेल्थ रेकर्ड सिष्टम लागू गर्न नगरपालिकालाई सुझाव दिए ।

कार्यक्रमका अध्यक्षसमेत रहेका आयोजक कोइराला मेडिकल हलका संचालक विमल कोइरालाले आगामी दिनमा मेलम्चीवासीलाई शिविरहरूमार्फत अझ गुणस्तरीय सेवा दिइने प्रतिबद्धता जनाए ।