चरिकोट—निःशुल्क स्वास्थ्य परीक्षण गर्न पाउने भएपछि नागरिकहरु दैनिक अस्पताल पुग्ने गर्छन् । बागमती प्रदेश सरकार स्वास्थ्य मन्त्रालयको आयोजनामा सदरमुकाम चरिकोटस्थित पशुपति चौलागाई स्मृति अस्पतालमा अहिले मुख्यमन्त्री जनता स्वास्थ्य कार्यक्रम चलिरहेको छ ।
हप्तामा दुई बार मात्र यो सेवा दिने भएकाले बिहान सबेरैदेखि टिकट लिन लाइन बसेका हुन्छन् । यो कार्यक्रमअन्तर्गत प्रत्येक बुधबार र बिहीबार २०/२० जना मात्र स्वास्थ्य परीक्षण गरिन्छ । हप्तामा ४० जनालार्ई मात्र कोटा भएतापनि एकैदिन ४० जनासम्म पुग्ने गरेको छ ।
३० वर्ष उमेर माथिका नागरिकहरुको निःशुल्क स्वास्थ्य परीक्षण गरिने भएकाले गाउँ–गाउँबाट समेत आउने गरेका पशुपति चौलागाई स्मृति अस्पताल व्यवस्थापन समितिका अध्यक्ष भरत नारायण प्रधानले बताए । सिमित कोटा र धेरै नागरिकको चाहना भएकाले धान्न गाह्रो भएको अध्यक्ष प्रधानले बताए ।
मुख्यमन्त्री जनता स्वास्थ्य कार्यक्रमअन्तर्गत औषधि खाइरहेका र दीर्घ रोगका बिरामीको स्वास्थ्य परीक्षण गरिदैन् । निरोगी मान्छेलाई रोग लाग्न नदिने यस कार्यक्रमको मुख्य लक्ष्य रहेको छ । साथै, नसर्ने रोगको पहिचानको लागि परीक्षण, निदान परामर्श र उपचार सम्बन्धी निःशुल्क स्वास्थ्य कार्यक्रम रहेको छ ।
हाल यस अस्पतालमा उपलब्ध सेवाहरु रगत, दिसा, पिसाब जाँच, मुटुको इसीजी, छातीको एक्सरे, कलेजोको एलएफटी, मिर्गौलाको आरएफटी, लिपिड प्रोफाइलका साथै सुगर, ब्लडप्रेसरलगायतका जाँच गर्दै आएको स्वास्थ्यकर्मी दिनेश जिम्बाले जानकारी दिए । महिलाको लागि भीआईए परीक्षणसमेत निःशुल्क गरिदैं आइएको छ ।
अस्पतालले पाएको ९ सय ३५ जनाको कोटामा अहिलेसम्म ६ सय ३० जनाले स्वास्थ्य सेवा पाइसकेका छन् । सेवा लिनेमा हालसम्म ४ सय ४३ पुरुष र १ सय ८७ जना महिला छन् । यसमध्येमा पनि ३० देखि ४० वर्ष उमेर समूहका २ सय ३६ जना छन् । ७० देखि ८५ वर्ष उमेर समूहका २० जना मात्र छन् । गत वर्ष यस अस्पतालले ७ सय जनाको मात्र कोटा पाएको थियो ।
यस अभियानलाई लम्ब्याउन सकेमा विपन्न र विकट गाउँका नागरिकलाई समेत सेवा दिन पाइने आशा अस्पतालले राखेको छ । अहिलेसम्म सेवा लिनेमा भीमेश्वर नगरपालिकाभित्रकै नागरिकको सहज पहुँच पुग्ने भएकाले सेवा लिनेमा यहीका बढी छन् । सुगर र ब्लडप्रेसर जाँच गर्न आउनेको संख्या बढी रहेका छन् ।
