काठमाडौं—काठमाडौं विश्वविद्यालय (केयु)को २८ औं दीक्षान्त सम्पन्न भएको छ । बिहीबार वरिष्ठ फिजिसियन डा. मृगेन्द्रराज पाण्डेको प्रमुख आतिथ्यतामा सम्पन्न केयुको दीक्षान्तमा स्वास्थ्य विज्ञानका ७१२ जना विद्यार्थी दीक्षित भएका छन् ।
दीक्षान्त समारोह प्रधानमन्त्री एवं केयुका कूलपति शेरबहादुर देउवाको अध्यक्षतामा सम्पन्न भएको थियो । समारोहमा केयुमा अध्ययनरत विभिन्न संकायका स्नातक, स्नातकोत्तर र विद्यावारीधिका गरी १ हजार ६ सय ९९ जना विद्यार्थी दीक्षित भएका छन् ।
मानविकी, शिक्षा, इञ्जिनियरिङ, कानून, व्यवस्थापन, स्वास्थ्य विज्ञान र विज्ञान विधाका ८ जना विद्यावारिधि, ८५ जना एमफिल, स्नातक र स्नातकोत्तर तहका गरी १ हजार ६ सय ६ जनासहित एक हजार ६ सय ९९ जना विद्यार्थी दीक्षित भएको हुन् । जसमा मानविकीका दुई सय २०, शिक्षाका २ सय २, इञ्जिनियरिङका २६, कानूनका ४० जना, व्यवस्थापनका चार सय ५२, स्वास्थ्य विज्ञानका सात सय १२ जना र विज्ञान संकायका ३७ जना विद्यार्थी दीक्षित भएका छन् ।
दीक्षित हुने विद्यार्थीमध्ये ७ सय ३४ जना पुरुष र ९ सय ६५ जना महिला छन् । दीक्षित हुनेमा क्यानडा, चीन, भारत, अस्ट्रिया, जर्मनी, इटाली, माल्दिभ्स पोर्चुगल, रूस, सिङ्गापुर, स्पेन, श्रीलंका, ताइवान र संयुक्तराज्य अमेरिका गरी १४ देशका एक सय ८६ जना विदेशी विद्यार्थी समेत छन् ।
