दोलखा —पूर्व संस्कृति पर्यटन तथा नागरिक उड्यन मन्त्री आनन्द पोखरेलको पहलमा दोलखाका विभिन्न स्वास्थ्य संस्थाहरुलाई स्वास्थ्य सामाग्री वितरण गरिएको छ । आइतबार जिल्ला समन्वय समिति दोलखाका प्रमुखमार्फत उक्त सामाग्री हस्तान्तरण गरिएको हो । करिव ४५ लाख मूल्य बरावरको स्वास्थ्य सामाग्री सहयोग गरेका छन् ।
नेपाल चीन हिमालयन फ्रेन्डसीप समाजले चीनको तिब्वत सरकारसँगको सहकार्यमा दोलखाका विभिन्न स्वास्थ्य संस्थाहरुमा आवश्यक रहेको स्वास्थ्य सामाग्रीहरु वितरण गरिएको हो । जिल्लाको सात गाउँपालिका र दुई नगरपालिकामा सञ्चालनमा रहेको अस्पतालहरुलाई पूर्वमन्त्री पोखरेलले एक कार्यक्रमको आयोजना गरी स्वास्थ्य सामाग्री हस्तान्तरण गरेका हुन् ।
संंस्थाले अक्सिनज ५० थान, इसिजी मेसिन २ थान, प्यासेन्ट मनिटर २ थान, अक्सिजन कन्सन्ट्रेटर ४ थान, प्यासेन्ट वेड १० थान, अक्सिमिटर २० थान, पीपीई सेट ५०० थान, माक्स १५ थान, मेडीकल ट्रली २ थान, डिजिटल थर्मोमिटर ९०० थान सहयोग हस्तान्तरण गरेको हो ।
जिल्ला स्वास्थ्य कार्यालय दोलखालाई ५० थान अक्सिजन सिलिन्डर, तामाकोशी गाउँपालिकालाई इसिजी मेसिन, प्यासेन्ट मनिटर, अक्सिमिटर पीपीइ सेटलगायत सामाग्री वितरण गरिएको छ भने सिंगटी अस्पताल, चरिकोट अस्पताल र अन्य स्वास्थ्य केन्द्रहरुलाई मेडिकल ट्रली, डिजिटल थर्ममिटर, अक्सिजन कन्सन्ट्रेटर, वेड, अक्सिमिटर लगायतका सामाग्री वितरण गरिएको छ ।
नेपाल चीन हिमालयन फ्रेन्डसीप समाजका संस्थापक अध्यक्ष तथा पूर्वमन्त्री आनन्द पोखरेलले जिल्लाको विभिन्न क्षेत्रमा रहेको नागरिकहरुलाई स्वास्थ्य उपकरणको अभावमा उपचार गर्न समस्या नहोस भन्ने उद्धेश्यले स्वास्थ्य सामग्रीहरु वितरण गरिएको बताए । कोभिड—१९ संक्रमणको बेलामा अक्सिजनको अभावमा जिल्लामा धेरै नागरिकहरुले अकालमा ज्यान गुमाउनु परेको हुँदा आगामी दिनमा त्यस्तो हुन नदिनका लागि अक्सिजन तथा अन्य स्वास्थ्य सामाग्री सहयोग गरेको उनले बताए ।
यो संस्थाले हिमाली १४ जिल्लाहरुमा स्वास्थ्य सामग्री वितरण तथा अन्य कामहरु गर्दै आइरहेको र दोलखामा स्वास्थ्य सामग्री निरन्तर वितरण गर्दै आएकोमा पुनः थप स्वास्थ्य सामाग्री सहयोग गरेको संस्थाका सचिव रिनन पोखरेलले बताए । प्राप्त सामाग्रीहरु आवश्यकताको आधारमा स्थानीय तहको स्वास्थ्य संस्थाहरुलाई सहयोग गरिएको र अक्सिजन सिलिन्डर तथा अक्सिजन कन्सन्ट्रेटर स्वास्थ्य कार्यालयमार्फत जिल्लामा सञ्चालित अस्पतालहरुलाई प्रदान गरिने जिल्ला समन्वय समितिका प्रमुख डवल पाण्डेले जानकारी दिए ।
