प्रहरीले पक्राउ गरेका डा. संजयकुमार साहलाई तत्काल रिहाइ गर्न एनएमए नारायणीको माग

काठमाडौं—नेपाल चिकित्सक संघ (एनएमए) नारायणीले वीरगन्जबाट पक्राउ गरिएका डा. संजयकुमार साहलाई तत्काल रिहा गर्न माग गरेको छ । संघको नारायणी शाखाले डा. साहलाई स-सम्मान रिहा नगरिए जुनसुकै संघर्ष गर्ने पनि चेतावनी दिएको छ ।

डा. साह २६ चैतमा नेसनल मेडिकल कलेज वीरगन्जबाट पक्राउ परेका थिए । प्रहरीले मेडिकल कलेजको प्रयोगशाला र फार्मेसीमा म्याद गुज्रिएको औषधि र केमिकल फेला परेपछि डा. साहसँगै मेडिकल कलेजका प्रबन्धक निर्देशक शहनवाज हुसेनलाई पक्राउ गरेको थियो ।

एनएमए नारायणीले डा. साहलाई मानमर्दन हुने गरी अपराधिक शैलीमा पक्राउ गरिएकोमा पनि गम्भीर ध्यानाकर्षण भएको जनाएको छ ।

उसले पेशागत दायित्व निर्वाह गर्ने क्रममा त्रुटि भएमा विधी प्रक्रिया अपनाएर अनुसन्धान गर्नुपर्नेमा घटनामा चिकित्सकलाई मानमर्दन गरिएको बताएको छ ।