काठमाडौं—अख्तियार दुरुपयोग अनुसन्धान आयोगले सामुदायिक विद्यालयका छात्राहरुलाई निःशुल्क दिइने स्यानिटरी प्याडमा भ्रष्टाचार गरेको आरोपमा गाउँपालिकाका तत्कालीन प्रमुख प्रशासकीय अधिकृतसहित पाँच जना विरुद्ध विशेष अदालतमा मुद्धा दायर गरेको छ । बिहीबार अख्तियारले सप्तरीको रुपनी गाउँपालिकाका तत्कालीन प्रमुख प्रशासकीय अधिकृत अरविन्दकुमार चौधरीसहित पाँच जना विरुद्ध विशेषमा भ्रष्टाचार मुद्धा दायर गरेको अख्तियारका प्रवक्रा नरहरि घिमिरेले जानकारी दिए ।
आर्थिक वर्ष २०७७/०७८ मा मिलेमतोमा अनुमान लागत नै तयार नगरेर स्यानिटरी प्याड खरिदमा भ्रष्टाचार गरेको भन्दैं अख्तियार मुद्धा दायर गरेको हो । उसले जस्मिन हाइजिनको ९ लाख ११ हजार ९ सय २५ रुपैयाँ बराबरको स्यानिटरी प्याडलाई १७ लाख ८५ हजार ९ सय २८ रुपैयाँमा खरिद गरेर भ्रष्टाचार गरेको आरोप पत्रमा उल्लेख छ ।
यो स्यानिटरी खरिदमा तत्कालीन प्रमुख प्रशासकीय अधिकृत चौधरी, लेखा अधिकृत श्यामसुन्दर यादव, माध्यमिक तह शिक्षक श्यामप्रसाद यादव, नायब सुब्बा सुजन, दाहाल र लक्ष्मी ट्रेडर्सका सप्लायर्स राजविराजका ललिताकुमारी महतोले मिलेमतोमा ८ लाख ७४ हजार रुपैयाँ भ्रष्टाचार भएको अख्तियारको ठहर छ ।
गाउँपालिकाले स्यानिटरी प्याड खरिद गर्दा सार्वजनिक खरिद ऐन,, २०६३ र सार्वजनिक खरिद नियमावली, २०६४ बमोजिम प्रचलित कानुनी व्यवस्थाको पालना गरेर लागत अनुमान नगरेको अख्तियारको अनुसन्धान देखिएको उल्लेख छ ।
स्यानिटरी प्याड खरिद बिक्रीमा अस्वभाविक मूल्य तिरेर हानी नोक्सानी पु¥याएको भन्दैं अख्तियारले चौधरी, श्याम सुन्दर, श्यामप्रसाद र सुजन दाहाललाई भ्रष्टाचार निवारण ऐन, २०५९ को दफा ८ को उपदफा (१) खण्ड (ञ) बमोजिम ८ लाख ७४ हजार ३ रुपैयाँ बिगो कायम गर्न र ऐनअनुसार कैद गर्न माग गरिएको छ । यस्तै, ललिताकुमारी साहलाई भ्रष्टाचार निवारण ऐन, २०५९ को दफा ८ को उपदफा (१) खण्ड (ञ) बमोजिम सोही ऐनको दफा २२ बमोजिम मतियार कसुरमा कारवाही गर्न माग गरेको छ ।
