वीरगन्ज—नेशनल मेडिकल कलेजमा १९ वर्षीय युवतीको डिम्बासयमा पलाएको सिस्ट दुरबिन प्रविधिबाट शल्यक्रिया गरी सफलतापूर्वक निकालिएको छ । गत बिहीबार महिनावारी गडबड भएर जम्मा भएर बनेको रगत र पानी जमेको सिस्ट (इण्डोमेट्रीओमा)लाई ल्याप्रोस्कोपी सर्जरी गरेर निकालिएको हो ।
कलेजका चिकित्सक डा. प्रवीण शाह, डा. रुवी श्रेष्ठ, रेजिडेन्ट डा. सरोज यादव, डा. स्नेहा श्रेष्ठको टिमले लामो समयदेखि इण्डोमेट्रीओमाबाट पीडित युवतीको सफल शल्यक्रिया गरेको हो । कलैया घर भएकी ती युवती लामो समयदेखि अनियमित महिनावारी हुने तथा महिनावारीका समयमा अत्याधिक पेट दुख्ने समस्याबाट पीडित थिइन् । उनी पाँच महिना अगाडि नै नेशनल मेडिकल कलेजमा उपचारका लागि आएपनि काठमाडौं समेत गएर स्वास्थ्य जाँच गराउँदा अप्रेसन गर्न सल्लाह दिइएको थियो । त्यसपछि उनी नेशनल मेडिकल कलेजमै गएर सोको उपचार गरेकी हुन् ।
‘उहाँ पाँच महिना अगाडि नै आउनु भएको थियो । बीचमा काठमाडौं पनि जानुभयो । नेशनल मेडिकल कलेजमै ल्याप्रोस्कोपी विधिबाट अप्रेसन हुन्छ भनेपछि यहीँ आउनु भयो र हामीले तीन वटा प्वाँल पारेर ८.८ सेमीको सिस्ट निकाल्यौं,’ शल्यक्रियामा संलग्न डा. प्रवीण साहले भने । शल्यक्रियामा कलेजका एनेस्थेसियाका डा.असिम गौडेल, रेजिडेन्ट डा.मेलिना असप्रित तथा ओटी स्टाफ इब्राहिम अन्सारीले सहयोग गरेका थिए ।
कुनैपनि महिलाहरुमा महिावारीमा अनियमितता, महिनावारी हुँदा अत्याधिक पेट दुख्ने समस्या भएमा डिम्बासयमा इण्डोमेट्रीओमाको जोखिम हुन्छ । अनियमित महिनावारी हुने सय जना महिनाहरुमा १० प्रतिशतलाई इण्डोमेट्रीओमाको जोखिम हुने डा. साहले जानकारी दिए ।
स्त्री तथा प्रसुति सेवाका लागि अत्याधुनिक उपकरणसहित दक्ष चिकित्सकहरु रहेको नेशनल मेडिकल कलेजकी निर्देशक नुसरत जहाँ अन्सारीले बताइन् ।
