धनुषा–कोभिड–१९ संक्रमणका कारण धनुषामा थप एक साता निषेधाज्ञा थप्ने निर्णय भएको छ । सोमबार बसेको जिल्ला विपद व्यवस्थापन समितिको बैठकले निषेधाज्ञा लम्ब्याउने निर्णय गरेको हो ।
कोभिड–१९ संक्रमणको पछिल्लो अवस्थबारे समीक्षा गर्दै समितिले निषेधाज्ञा पाँचौ पटक थप गरेको छ । यसअघि जेठ १७ गते एक साता निषेधाज्ञाको म्याद थप गरिएको थियो । समितिको बैठकले बिहान ११ बजे सम्म पसलहरु खोल्न पाइने निर्णय पनि गरेको छ ।
अतिआवश्यक प्रयोजनका पसलहरु ११ बजेसम्म खोल्न सक्ने धनुषाका प्रमुख जिल्ला अधिकारी बन्धु बाँस्तोलाले जानकारी दिए । त्यस्तै बैंक तथा वित्तीय संस्थाहरुमा भने ५० प्रतशित कर्मचारी उपस्थित भई सेवा सुचारु गर्न सक्ने निर्णयसमेत बैठकबाट भएको छ ।
पर्सामा छैटौं पटक निषेधाज्ञा थप,असार ६ गते सम्म कायम रहने
जिल्ला कोभिड–१९ संकट व्यवस्थापन केन्द्र (डिसिसिएमसी) पर्साले ७ असार राती १२ बजेसम्मका लागि निषेधाज्ञाको अवधि थप गरेको छ ।
१६ बैशाखदेखि पर्सा जिल्लामा निषेधाज्ञा जारी छ । पर्सामा छैठो पटक ६ असारसममका लागि निषेधाज्ञाको अवधि थपिएको प्रमुख जिल्ला अधिकारी पिताम्बर घिमिरेले बताए ।
कोभिड–१९ संकट व्यवस्थापन अध्यादेशको दफा, ४ र स्थानीय प्रशासन ऐन, २०२८ को दफा ६(३) ले दिएको अधिकार प्रयोग गरी पर्सा जिल्लाभर २०७८ जेठ ३० गते राति १२.०० बजेदेखि ६ असार राति १२.०० बजेसम्म लागु हुने गरी निषेधाज्ञा आदेशलाई निरन्तरता दिइएको घिमिरेले बताए ।
