जनकपुर—धनुषाको जानकी मेडिकल कलेज तथा शिक्षण अस्पतालका कर्मचारी तलब नपाएपछि पुनः आन्दोलित बनेका छन् । मेडिकल कलेजले तलब नदिएपछि उनीहरु विगत १५ दिनदेखि कलेज परिसरमा धर्नामा बसेका हुन् ।
६ वर्षदेखि बाँकी रहेको सञ्चय कोष, दसैं खर्च, नियमित तलब भत्ता पाउनुपर्नेलगायतका माग राख्दै कर्मचारीहरू धर्नामा बसेका छन् । पटक—पटक तलब उपलब्ध गराउन भने पनि कलेजले वास्ता नगर्दा धर्ना बस्नु परेको कर्मचारीहरुले गुनासो गरेका छन् ।
यसअघि भदौ १५ मा कर्मचारीले अस्पतालमा तालाबन्दी समेत गरेका थिए । तलब नदिएसम्म ताला नखोल्ने अडान कर्मचारीले राखेपछि अस्पताल प्रशासनले जिल्ला प्रहरी कार्यालयमा उजुरी दिएको थियो । प्रहरी कार्यालयमै कलेजका तर्फबाट प्रशासन प्रमुख दयानन्द गोइत र कर्मचारीबीच तीन बुँदे सम्झौता भएको थियो ।
सम्झौतामा असोज ४ गतेसम्म कर्मचारी र कलेज दुवै पक्षले लेखापाल राखेर हिसाब निकाल्ने, असोज १ गते तालाबन्दी खोल्ने र असोज ३० गतेसम्म कलेजका अध्यक्ष आएर कर्मचारीको समस्या समाधान गर्ने उल्लेख छ । तर, सम्झौता कार्यान्वयण गर्न कलेज तयार नभएपछि पुनः बाध्य भएर आन्दोलन गर्नु परेको कर्मचारीहरुले बताएका छन् ।
सम्झौता कार्यान्वयण नगरेपछि बाध्य भएर धर्नामा बसेको कर्मचारी आन्दोलन संघर्ष समितिका अध्यक्ष उमेश यादवले बताए । उनले तलब माग्दा उल्टै आफूलाई स्पष्टीकरण सोधेको गुनासो गरे । माग पूरा गर्ने सम्झौता गरेका प्रशासन प्रमुख दयानन्द झाले नै किन आन्दोलन गरेर कलेजलाई समस्यामा परेको भन्दै स्पष्टीकरण सोधेको उनको भनाइ छ ।
