काठमाडौं—न कुनै विशेष तयारी कक्षा, न त ट्युसन नै । बलियो शैक्षिक ब्याकग्राण्ड र निरन्तर पढिरहने बानीकै कारण मन्जु ऐर एमएनको इन्ट्रान्स टप गर्न सफल भइन् । चिकित्सा शिक्षा आयोगले लिएको एकीकृत प्रवेश परीक्षामा एमएन/एमएस्सी नर्सिङ/मिडवाइफ्रीतर्फ सुदूरपश्चिम डडेल्धुराकी मन्जुले पहिलो नम्बरमा नाम निकालिन् ।
इन्ट्रान्सबाट नर्सिङको स्नातकोत्तरका लागि छानिएका ३५२ जनाध्ये मन्जुले २०० पूर्णांकमा सबैभन्दा बढी १३४.५ प्रतिशत अंक ल्याएकी छन् । २९ वर्षीया मन्जु पढाइमा सानैदेखि अब्बल हुन् । त्यही कारण उनले २० वर्षमै दुई पटक लोकसेवामा नाम निकालेकी थिइन् । पहिलो पटक अनमीमा र त्यसको ६ महिनामै दोस्रो पटक स्टाफ नर्समा । त्यसपछि उनले ब्याचलर इन नर्सिङ साइन्स (बीएनएस) पनि महाराजगन्ज नर्सिङ क्याम्पसमा पूर्ण छात्रवृत्तिमै नाम निकालेर पढिन् ।
‘हरेक दिन अलिअलि पढिरहने बानी छ । एकै पटक परीक्षा आयो अब पढ्नुपर्छ भन्ने बानी मेरो छैन्,’ यी टपर नर्स भन्छिन्, ‘त्योबाहक बीएनएस पढ्दा महाराजगन्जको बेस । त्यहाँको क्लासमा पढाइएका कुरा र त्यहाँका म्यामहरुले हालिदिनुभएको बलियो जगले मलाई यो इन्ट्रान्स टप गर्न एकदमै सहयोग ग¥यो ।’ मन्जुको सफलताको प्रमुख कारण निरन्तरता हो । ‘यो निरन्तरताले दिलाएको सफलता दिएको हो,’ उनी थप्छिन्, ‘बेस पनि एकदमै चाहिँदो रहेछ ।’
वि.सं. २०५० सालमा डडेल्धुराको अमरगढी नगरपालिका—१ मा जन्मिएकी हुन्, मन्जु । बुवा भीमबहादुर ऐर र आमा दुर्गादेवी ऐरका तीन सन्तानमध्ये उनी माइली हुन् । उनका बुवा नेपाल विधुत प्राधिकरणका सरकारी जागिरे हुन् भने आमा गृहणी । जन्मिएको डडेल्धुरामा भएपनि उनको परिवारको बसाइँ भने धनगढीमै छ । त्यहीकारण भीमबहादुर र दुर्गादेवीका तीन जना सन्तान नै धनगढीमै पढेबढेका हुन् ।
मन्जुको प्रारम्भिक शिक्षादीक्षा धनगढीमै भएको हो । उनले स्थानीय स्टेपिङ स्टोन इंग्लिस स्कुलबाट आफ्नो शिक्षादीक्षा अगाडि बढाइन् । स्कुल जीवनमा उनलाई इंग्लिस र नेपाली विषय बढी मन पर्थे । ‘मलाई सजिलो पनि लाग्ने र मन पर्ने विषयहरु यी दुई वटा नै थिए,’ ड्युटीबाट छोटो समय फुर्सद निकालेर हेल्थआवाजसँग गफिएकी उनले भनिन् । पढाइबाहेक मन्जुको नृत्यमा पनि विशेष लगाव थियो । त्यहीकारण स्कुल तथा कलेजमा हुने हरेक कार्यक्रममा नृत्यमा भाग लिएकै हुन्थिन् । संगीतकी पनि उनी उतिकै पारखी हुन् ।
वि.सं. २०६४ सालमा उनले फस्ट डिभिजनमा एसएलसी उत्तीर्ण गरेकी हुन् । एसएलसीपछि उनी पिसिएल नर्सिङ पढ्नका लागि सेती—महाकाली नर्सिङ क्याम्पस महेन्द्रनगर गइन् । नर्सिङको पढाइ उनले बुवाकै इच्छामा चयन गरेकी हुन् । ‘म त्यतिबेला सानै भएकाले के पढ्ने भन्ने मेरो व्यक्तिगत रोजाइ केही थिइन्,’ उनले सुनाइन्, ‘मलाई नर्सिङ पढ्दा के हुन्छ भन्ने पनि त्यति थाहा थिएन । त्यही कारण बुवाको इच्छा र घरपरिवारकै रोजाइमा मैले नर्सिङ पढेकी हुँ ।’
वि.सं. २०६८ सालमा उनले महेन्द्रनगरबाट पिसिएल नर्सिङको अध्ययन पूरा गरिन् । त्यसपछि केही समय धनगढीका प्राइभेट अस्पतालहरुमा रहेर बिरामी सेवा गरिन् । ‘दुई वर्ष प्राइभेट हस्पिटलमा ओटी नर्सका रुपमा काम गरे,’ उनले भनिन् । त्यही बेला उनले सरकारी जागिरका लागि प्रयास गरिन् । पहिलो प्रयासमै उनी वि.सं. २०७० मा लोकसेवाबाटै सरकारी जागिरमा प्रवेश गरिन् ।
त्यसपछि उनले स्टाफ नर्स (पाँचौ तह)को लोकसेवा पास गरिन् । २० वर्षकै उमेरमा लोकसेवाबाट सरकारी सेवामा जागिर सुरु गरिन् । लोकसेवामा पहिलो प्रयासमै कसरी सफलता प्राप्त भयो ? ‘निरन्तरता नै प्रमुख कुरा रहेछ,’ उनले भनिन्, ‘निरन्तर पढ्दा त्यसले परीक्षामा रिजल्ट पनि राम्रो दिन्छ । लोकसेवाकै लागि त्यस्तो विशेष तयारी गरेकी थिइन् ।’ त्यसको दुई वर्षपछि उनले थप उच्च शिक्षाका लागि पहल थालिन् ।
पढाइमा सधैं अब्बल र निरन्तर पढिरहने बानीकै प्रतिफल मान्नुपर्छ उनले पहिलो प्रयासमै महाराजगन्ज नर्सिङ क्याम्पसमा पनि ब्याचलर इन नर्सिङ साइन्स (बीएनएस)मा पूर्ण छात्रवृत्तिमा नाम निकालिन् । वि.सं.२०७२ सालमा महाराजगन्गमा बीएनएस पढ्न थालिन् । ‘त्यतिबेला म डडेल्धुराको दुर्गम ठाउँ जोगबुढामा जागिर गर्दै एक्लै आफै तयारी गरिरहे,’ उनले भनिन्, ‘निरन्तर एक दुई घण्टा पढिरहन्थे । त्यही कारण नाम निस्कियो ।’ वि.सं. २०७५ सालमा उनले बीएनएसको अध्ययन सकिन् ।
त्यसपछि मन्जु पुनः आफ्नो सरकारी जागिरे जीवनमा फर्किइन् । नेपाल सरकारको जोगबुढा सामुदायिक अस्पतालमै गएर सेवा गर्न थालिन् । त्यहाँ पुनः ८ महिना काम गरिन् । तीन वर्ष जोगबुढामा रहेर बिरामी सेवामा तल्लीन रहिन् । त्यसपछि मन्जुको प्रदेशमा समायोजन भयो । उनको पोष्टिङ मालाखेती अस्पतालमा भयो । वि.सं. २०७६ सालबाट उनी मालाखेती अस्पतालमा स्टाफ नर्सका रुपमा कार्यरत छन् ।
मालाखेतीमै आफ्नो ड्युटी र दैदिनका कामहरु गर्दै उनले पढाइलाई निरन्तरता दिइरहिन् । त्यही निन्तरताले उनलाई देशभरकै एमएन पढ्न प्रतिस्पर्धामा रहेका नर्सहरुमा प्रथम बनायो । उनले एमएन इन्ट्रान्स टप गरिन् । यी युवा नर्सको भविष्यमा पनि बिरामी सेवामै रहने योजना छ । सरकारी जागिरका लागि माथिल्लो तहका लागि आफूले निरन्तर प्रयास जारी राख्ने हेल्थआवाजलाई सुनाइन् । ‘भविष्यमा सरकारी सेवामा अझ माथिल्लो तहमा ट्राइ गर्दै जाने योजना छ,’ कुराको बिटमार्नुपूर्व उनले भनिन् ।
