काठमाडौं—चिकित्सा शिक्षा स्नातकोत्तर तह (पिजी)का विभिन्न कार्यक्रमको एकीकृत प्रवेश परीक्षाको नतिजा सार्वजनिक भएको छ । आइतबार चिकित्सा शिक्षा आयोगले विभिन्न १० वटा कार्यक्रमको प्रवेश परीक्षाको नतिजा सार्वजनिक गरेको छ । जसमा एमडी/एमएस वीथ एक्सपिरिन्यस खुल्लातर्फ २८ वर्षीय युवा डा. आलोककुमार यादवले टप गरेका छन् ।
२ हजार ५ सय २ जना विद्यार्थीमध्ये पहिलो नम्बरमा नाम निकालेका उनले दोस्रो प्रयासमा एमडी/एमएसको इन्ट्रान्स टप गरेका हुन् । डा. आलोकले पहिलो प्रयासमै आयोगको प्रवेश परीक्षा पास गरेका १६२ स्कोर ल्याएर छन् । बाराको सामान्य किसान परिवारमा जन्मिएका उनी सरकारी स्कुलका उत्पादन हुन् । उनले सरकारी छात्रवृत्तिमै मणिपाल मेडिकल कलेज पोखराबाट एमबीबीएस गरेका हुन् । एमबीबीएसमा पनि मधेशी कोटामा उनले टप गरेका थिए भने कक्षा १० मा पर्सा जिल्ला टप गरेका हुन् ।
सिम्रौनगढ नगरपालिका—१० देवापुर टेटा वि.सं. २०५० साल माघमा जन्मिएका हुन्, आलोक । उनका बुवा विनोद यादव र आमा निलमदेवी यादवका तीन सन्तानमध्ये उनी जेठा हुन् । उनको परिवार कृषिकर्ममा संलग्न सामान्य परिवार हो । त्यही कारण आलोकको शिक्षादीक्षा पनि सरकारी स्कुलबाटै अगाडि बढेको हो ।
कक्षा ५ सम्म उनले स्थानीय गाउँकै श्रीपोलानेरा प्रावि स्कुलमा पढे । कक्षा ६ उनले सिम्रौनगढ नगरपालिकाको सिम्रौनगढ स्कुलमा पास गरेका हुन् । त्यसपछिको शिक्षा भने उनको वीरगन्जस्थित त्रिजुद्ध महावीरप्रसाद रघुवीरराम स्कुलबाट भएको हो । उनले त्यही स्कुलबाट वि.सं. २०६५ सालमा एसएलसी पर्सा जिल्ला टप नै गरे ।
‘मेरो सबै स्कुलिङ सरकारी स्कुलमै भएको हो,’ सोमबार विहान हेल्थआवाजसँगको कुराकानीमा उनले भने, ‘दाइहरु सबै पढ्ने नै हुनुहुन्थ्यो । उहाँहरुको हौसलामा मेरो पढाइ सधैं राम्रो रह्यो ।’ उनलाई स्कुलमा गणित विषय सबैभन्दा बढी मन पथ्र्यो । त्यसबाहेक उनको खेलकूदमा रुचि छ । लाइभ क्रिकेट हेर्न रुचाउँछन् । एसएलसी सकेपछि उनी उच्च शिक्षा अध्ययनका लागि काठमाडौं आए ।
काठमाडौंको माइतीघरस्थित सेन्ट जेभियर्स कलेजमा इन्ट्रान्स पास गरेपछि उनी विज्ञान पढ्न थाले । ‘सानैदेखि डाक्टर बन्छु भन्ने सपना थियो,’ उनी सुनाउँछन्, ‘त्यसैले मैले बायोलोजी लिएर सेन्ट जेभियर्समा साइन्स पढ्न थाले ।’ वि.सं. २०६७ सालमा उनले प्लस टु उत्तीर्ण गरे ।
‘हुने विरुवाको चिल्लो पात’ भनेझैं सानैदेखि पढाइमा उनी अब्बल थिए । पढाइ अब्बल भएकै कारण उनले आफूलाई एकपछि अर्को प्रमाणित गर्दै गए । एमबीबीएसको इन्ट्रान्समा उनले मधेशी कोटामा टप परे । ‘त्यसपछि म सन् २०१२ मा एमबीबीएस पढ्नका लागि पोखरास्थित मणिपाल मेडिकल कलेज गए,’ उनले भने । सरकारी छात्रवृत्तिमा एमबीबीएस पढ्ने अवसर पाएका उनले ६ वर्षमा त्यहाँबाट एमबीबीएस अध्ययन सके ।
एमबीबीएस पास गरेपछि सरकारसँगको करार सम्झौताअनुसार उनी पर्साको पोखरिया अस्पतालमा काम गर्न गए । त्यहाँ दुई वर्ष काम गरेपछि उनले पिजीका लागि इन्ट्रान्स दिए । पिजीको इन्ट्रान्स टप गरेर उनले सरकारी स्कुलमै पढेकाले पनि टप गर्न सक्छन् भन्ने उदाहरण प्रस्तुत गरेका छन् ।
सरकारी स्कुलमै पढेर पनि टप गर्ने फर्मुला के हो ? ‘सरकारी स्कुलमा पढाइ राम्रो नै हुन्छ । पढाइको वातावरण पनि प्रतिस्पर्धात्मक नै हुन्छ,’ हेल्थआवाजको जिज्ञासामा उनी भन्छन्, ‘मुख्य कुरा घरको वातावरणमा भर पर्छ । मेरो घरको वातावरण राम्रो थियो । दाइहरु सबैजना पढ्ने हुनुहुन्थ्यो, त्यही भएर मलाई सहज थियो ।’ त्यसभन्दा पनि मुख्य कुरा त आफूमै भर पर्ने उनको मत छ ।
हजारौं विद्यार्थीबाट पिजीको इन्ट्रान्स टप गरेपछि उनलाई कस्तो अनुभव भइरहेको छ ? भन्छन्, ‘खुसी लागिरहेको छ । टप गर्न सके ।’ पिजीका यी इन्ट्रान्स टपरले बाहिरका लागि सेल्फ तयारी गरेका थिए । तर, स्वदेशमै इन्ट्रान्स हुने भएपछि परीक्षा दिइहाले । ‘मैले बाहिर जानका लागि सेल्फ तयारी गरिरहेको थिए,’ उनी भन्छन्, ‘इन्ट्रान्स हुने भएपछि फारम भरेर परीक्षा दिए । पहिलो नम्बरमै नाम निस्किएछ ।’
उनको तयारी औसत दैनिक ५—६ घण्टा पढ्थे । ‘दैनिक औसतमा ५—६ घण्टा पढ्थे । तर, घरमै बसेर सेल्फ तयारी गरिरहेकाले घरमा कहिलेकाही अन्य कामहरु पनि गर्नुपथ्र्यो,’ उनले भने । नेपाल टप गरेका डा. आलोक विशेषज्ञ रेडियोलोजिष्ट बन्ने सोचमा छन् । किन ? भन्छन्, ‘रेडियोलोजी पढ्छु होला । पोखरियामा काम गर्दाखेरि मलाई भिडियो एक्स रे गर्न मन पथ्र्यो । त्यसमा मलाई बढी रुचि लाग्थ्यो । त्यही कारण मलाई रेडियोलोजी नै पढ्छु भन्ने छ ।’ कुशल विशेषज्ञ रेडियोलोजिष्टको यात्राका लागि डा. आलोकलाई शुभकामना ।
