दलित समुदायका बालबालिकालाई नि:शुल्क सर्वोत्तम पीठो वितरण

दोलखा – दोलखाको वैतेश्वर गाउँपालिकाका दलित समुदायका बालबालिकाहरुलाई नि:शुल्क सर्वोत्तम पीठो वितरण गरेको छ । ‘सेभ द चिल्ड्रेन’ पहुँच परियोजना अन्तर्गत २ सय ८५ जना दलित बालबालिकालाई सर्वोत्तम पीठो वितरण गरेको गाँपालिकाका उपाध्यक्ष रविचन्द्र आचार्यले जानकारी दिए।

पालिकाभित्रका ६ महिनादेखि ५ वर्षमुनिका दलित बालबालिकाहरुलाई सर्वोत्तम पीठो वितरण गरिएको हो। पौष्टिक आहाराका लागि एक जना बराबर ९ किलोको दरले सर्वोत्तम पीठो वितरण गरिएको ‘सेभ द चिल्ड्रेन’ पहुँच परियोजनाका सम्पर्क व्यक्ति देवराज खत्रीले बताए । केही महिनापछि पीठो प्राप्त गरेका बालबालिकाका तौल र उचाईको अवस्था परीक्षण गरी थप पोषणको कार्यक्रम सञ्चालन गरिने पनि उनले जानकारी दिए ।

उनका अनुसार ४ वर्षदेखि पालिकामा सञ्चालित परियोजना अन्तरर्गत वडागत बाल अक्षयकोष सञ्चालन गरी कोषको व्याजबाट विपन्न बालबालिकालाई छात्रवृत्ति वितरण, पन्जिकरणका लागि सबै वडामा इन्टरनेट, कम्प्युटर सफ्टवेयर जडान, अपाङ्गता भएका व्यक्तिहरुका लागि शिविर सञ्चालन गरी परिचयपत्र वितरण गर्ने र बालअधिकार सम्बन्धि तालिम, गोष्ठी सञ्चालन गरिने जनाएको छ ।