ललितपुर—बी एण्ड बी अस्पतालले रोबोटिक शल्यक्रियाको सुरुवात गरेको छ । बी एण्ड बीले अत्याधुनिक प्रविधीबाट रोबोटिक शल्यक्रियाको सुरुवातले गरेको जनाएको छ ।
‘यस अत्याधुनिक शल्यक्रिया प्रविधिले सुक्ष्म शल्यक्रियाको प्रक्रियालाई पनि अत्यन्त सटीकताका साथ सम्भव बनाउँछ, रिकभरी समय कम गर्छ र बिरामीका लागि छिटो स्वास्थ्य लाभ हुन्छ,’ अस्पतालले भनेको छ, ‘उच्च प्रशिक्षित सर्जनहरूद्वारा सञ्चालित रोबोटिक प्रणालीले जटिल शल्यक्रियामा सटिकता र दक्षता सुनिश्चित गर्दै स्वास्थ्य सेवाप्रदान गर्ने नयाँ मापदण्ड स्थापित गरेको छ ।’
बी एण्ड बी अस्पतालका प्रा. डा. जगदीशलाल वैद्यले आफूहरुले नेपालमा रोबटिक शल्यक्रिया गर्ने पहिलो अस्पताल रहेको दावी गरे । ‘नेपालमा रोबोटिक शल्यक्रिया प्रदान गर्ने पहिलो अस्पताल हुन पाउँदा हामी उत्साहित छौं । यो नवीन प्रविधी हाम्रा बिरामीहरूलाई विश्वस्तरीय चिकित्सा सेवा प्रदान गर्ने प्रतिबद्धतामा महत्वपूर्ण कदम हो,’ डा. वैद्यले भने, ‘रोबोटिक शल्यक्रियाले न केवल शल्यक्रिया प्रक्रियाको गुणस्तर बढाउनेछ । यसले परम्परागत शल्यक्रियासँग सम्बन्धित जोखिम र रिकभरी समयलाई पनि कम गर्नेछ ।’
रोबोटिक शल्यक्रियाको सुरुवातले संस्थाको निरन्तर सुधार र चिकित्सा प्रविधिमा अत्याधुनिकता अपनाउने प्रतिबद्धतालाई दर्शाउने अस्पतालले जनाएको छ ।
