जुम्ला—जुम्लामा दुई दिने बृहत यौनिकता शिक्षा तालिम सुरु गरिएको छ । प्लान नेपाल, पेस नेपाल र क्याड नेपाल जुम्लाको आयोजनामा यौनिकता तालिम सुरु गरिएको हो ।
प्लान नेपालको सहयोगमा बालिका सशक्त परियोजनाअन्तर्गत पेस नेपाल र क्याड नेपालका कार्यसमितिका सदस्य र कर्मचारीलाई यौनिकता शिक्षाका विषयमा शनिबारदेखि दुई तालिम सञ्चालन गरिएको हो । परियोजना सञ्चालन भएको क्षेत्रमा यौनिकता शिक्षा प्रदान गर्नका लागि कार्यसमितिका सदस्य र कर्मचारीलाई तालिम दिएको हो ।
तालिमका प्रशिक्षक प्लान नेपालका यौन तथा प्रजनन् स्वास्थ्यका प्राविधिक सल्लाहकार निराजन खड्का यौनिकता शिक्षा मानव यौन तथा यौनिकताको शारीरिक, भावनात्मक, सांस्कृतिक, सामाजिक र व्यवहारिक पक्ष भएको उल्लेख गर्छन् । उनी यौनिकताले मानिसको मूल्य तथा मान्यता, यौनसँग प्रत्यक्ष सम्बन्ध भएका बृहत अर्थ, यसप्रतिको बुझाइ तथा प्रयोग र नियन्त्रण वा सीमालाई बुझाउने बताउँछन् । यही शिक्षा अभावकै कारण समाजमा बालविवाह बढिरहेको उनको भनाइ छ ।
बालविवाह हुनुका कारण अशिक्षा, चेतनाको कमी, गरिवि जस्ता धेरै कारण भने पनि मुख्य यौन तथा प्रजनन स्वास्थ्यको शिक्षा नपुगेर हो । १३ देखि १९ वर्ष उमेर समुहका किशोरकिशोरीलाई यौनिकता शिक्षा दिनुपर्ने आवश्यकता देखिएको छ । यौनिकता, यौन तथा प्रजनन स्वास्थ्यसम्बन्धी गरिएका विभिन्न अध्ययनका अनुसार यौनिकता शिक्षामा आधारित जीवनोपयोगी सीप अभावका कारण किशोरकिशोरीले विभिन्न किसिमका चुनौती सामना गर्नु परेको उनले बताए ।
यौन तथा प्रजनन स्वास्थ्यका विषयमा जिज्ञासाउपर सही जानकारी नहुँदा वा जानकारी पाउने अवसर नहुँदा गलत सूचना प्राप्त गर्ने सम्भावना हुन्छ । गलत वा भ्रमपूर्ण सूचनाका कारण उनीहरूले जोखिमपूर्ण यौन व्यवहार अपनाएका हुन्छन् । यसकारण किशोरकिशोरी तथा युवाका लागि पहुँच पुग्ने गरी यौन तथा प्रजनन् शिक्षा दिन आवश्यक रहेको छ,’ उनले भने ।
