डा. गिर्वाणराज तिमिल्सिना लाजिम्पाटस्थित ट्राभल मेडिसिनमा छुट्टै पहिचान बनाइरहेको श्रीद्धि इन्टरनेशल हस्पिटलका कार्यकारी अध्यक्ष हुन् । ४ रोपनी क्षेत्रफलमा फैलिएको हरभरा स्वच्छ वातावरण रहेको उक्त अस्पताललाई नमुना अस्पतालका रुपमा विकास गर्ने योजनाका साथ उनी काम गरिरहेका छन् ।
४ वर्षमै श्रीद्धि इन्भेष्टमेन्ट कम्पनीमार्फत १ सय बढीलाई रोजगारी दिएका ४० वर्षीय डा. गिर्वाण सधैं फ्रेस देखिन्छन् । धेरै मानिसहरु एउटै भूमिकामा रहँदा पनि खुशी हुँदैनन् तर उनी धेरै भूमिकामा रहँदा पनि तनावरहित र फिट देखिन्छन् । अनुहारमा सधैं झल्किने खुसीले उनको अनुहारमा हमेशा ताजगी देखिन्छ ।
पेशा र व्यवसायका क्रममा आइपर्ने समस्याका बाबजुद डा. गिर्वाण सहज र सरल दैनिकी छ । ग्रीनहिल सिट हाउजिङको आफ्नै बंगलामा विहान ६ नबज्दैं नजिकैको गोकर्ण जंगलका चराचुरुङगीको मिठो आवाजसँगै उनको निन्द्रा खुल्छ । उनी बेडमै १ गिलास तातो पानी पिउँछन् । त्यसपछि मोबाइलमा देश—विदेशका ताजा अपडेट लिन्छन् अनि बल्ल बेडबाट बाहिर निस्कन्छन् ।
त्यसपछि उनको नृत्य कर्म सुरु हुन्छ । नृत्यकर्म सकेपछि उनी लिभिङ रुममा चिनीबिनाको कालो कफी चुस्कीसँगै पत्रपत्रिका र कहिलेकाही टेलिभिजन आँखा डुलाउँछन् । कहिले पत्रिका पढ्छन् भने अक्सर टिभीमा सन्देशमूलक कार्यक्रम हेर्छन् । त्यसबाट बाँकी १ घण्टा किचन, लुगा सरसफाइ, पानी व्यवस्थापनलगायतका काममा रमाउँछन् ।
यतिकैमा उनको विहानको खाना तयार भइसकेको हुन्छ । उनी प्रायः सधैं विहान ९ बजे घरमै खाना लिन्छन् । उनको सामान्य नेपाली खानामा च्याख्ला/चामल, दही, साग, दाल र सिजनल तरकारी हुन्छ । खानापछि उनी आफै गाडी हाँकेर अफिसका लागि निस्कन्छन् । अफिस जाँदा गाडीमा गीतहरु सुन्छन् । त्यसपछि उनी दिनभर अफिसका कामहरुमा व्यस्त रहन्छन् । साँझपख ६ बजे अफिसबाट घर फर्कदा उनी जामका बीच स्ट्रेश फ्री हुने खालका गीतहरुको भरपूर आनन्द लिदैं घर पुग्छन् । तर, डा. गिर्वाणको यो एकनासको जीवनशैलीबाहेक उनका अन्य धेरै जिम्मेवारी, भूमिका र रुचिहरु छन् ।
१ . मेडिकल डाक्टर
नेपाल मेडिकल कलेज अत्तरखेलबाट आफ्नो मेडिकल शिक्षा सुरु गरेका डा. तिमिल्सिनाले बीचको पढाइसँगै अहिले विश्व प्रसिद्ध हावार्ड युनिभर्सिटीबाट ट्राभल मेडिसिनका फेलोसीप सकेका छन् । अमेरिका र युरोपका विकसित देशको सेवा सुविधा र अवसरलाई छाडेर स्वदेश फर्किएका उनी नेपाली सुन्दरतामा मुग्ध बन्न विदेशबाट आउने पर्यटकहरुको उपचार संलग्न छन् । उनकै नेतृत्वको श्रीद्धि इन्टरनेशल हस्पिटलमा विश्वस्तरीय हेल्थकेयरको प्रबन्ध छ । विहान ९ः३० बजे अस्पताल पुग्ने उनी भर्ना भएका बिरामीलाई राउण्ड लिन्छन्, नर्सहरुसँग बिरामीको स्वास्थ्य अवस्थाको जानकारी माग्छन् । उनी विदेशी बिरामीको स्वास्थ्य परीक्षण मात्रै गर्दैनन्, उनीहरुसँग घुलमिल हुन्छन्, नेपालको सुन्दरता र पर्यटकीय गन्तब्यहरुका बारेमा पनि विदेशीहरुलाई ब्रिफिङ गर्छन् ।
२. प्रशासक
विहान ९ः३० बजे अस्पताल पुग्छन् । अफिस छिर्ने बितिकै गार्डदेखि सबै विभागहरु चेक गर्छन् । त्यसपछि कार्यकक्षमा छिर्छन् । एडमिटेड बिरामीहरुबारे नर्ससँग अपडेट लिनछन्, राउण्ड गर्छन् । त्यसपछि च्याम्बरमा छिर्छन् । २ मिनेट ध्यानमग्न भएर कार्यकक्षको वातावरणको आनन्द लिन्छन् । त्यसपछि इमेल चेक गर्छन् । त्यसपछि सबै विभागका विभागीय प्रमुखहरुसँगको छलफलको समय हुन्छ । फाइनान्स, एडमिन र इन्स्योरेन्स विभागको अपडेट लिन्छन् र आवश्यक निर्देशनहरु दिन्छन् ।
मेडिकल टुरिज्ममा कसरी अगाडि बढ्ने भन्ने विषयमा रणनीति र योजना बनाउन केही समय खर्चन्छन् । पेन्डिङका कामहरु फत्ते गर्छन् । त्यसपछि उनी दैनिक भेटघाट र बैठकहरुमा व्यस्त रहन्छन् । अन्य कम्पनीहरु प्नि रहेकाले ती कम्पनीका अपडेटहरु पनि लिन्छन् । साँझ ६ बजेसम्म उनको प्रशासकीय भूमिका जारी रहन्छ । डा. गिर्वाणमा एक कुशल प्रशासक कसरी हुन भने उनी हरेक कर्मचारीको मनोभावना बुझ्न व्यक्तिगत रुपमै जोडिएका हुन्छन्, त्यो हेल्परदेखि सिईओसम्म ।
३. व्यवसायी
श्रीद्धि इन्भेन्टमेन्ट कम्पनीका कार्यकारी अध्यक्ष हुन्—डा. गिर्वाण । उनको यो माउ कम्पनीअन्तर्गत अन्य विभिन्न एक दर्जन कम्पनीहरुमा लगानी छ । लो प्रोफाइलमा बस्न रुचाउने उनले यो विजनेश साम्राज्य ४ वर्षकै छोटो अवधिमै खडा गरेका हुन् । अहिले उनको सबै कम्पनीमा गरेर १ सयभन्दा बढी कर्मचारी छन् । ‘कसैको अन्डरमा बस्न नरुचाउने स्वभावकै कारण मैले आफ्नै व्यवसाय सुरु गरेको हुँ,’ उनी भन्छन् ।
४. ट्राभलर
डा. गिर्वाण एक ट्राभलर पनि हुन् । स्वदेश र विदेश दुवैतिर घुम्नु उनको उतिकै रुचिमा पर्छ । हालैमात्र मार्दी हिमालको ट्रेकिङ सकेका उनी टे«किङ र हाइकिङमा उल्कै रमाउँछन् । काठमाडौं वरपरका चिसापानी, बुढानिलकण्ठ, नगरकोट, पालुङ, चन्द्रागिरीलगायतका सबैजसो हाइकिङ रुटहरुको स्वाद चाखिसकेका उनी ट्रेकिङमा धौलागिरी, जोमसोम, एभरेष्ट बेसक्याम्प, लाङटाङलगायतका २ दर्जन ठाउँमा पुगिसकेका छन् ।
स्वदेशमात्रै होइन्, विदेश भ्रमणमा पनि यी युवा चिकित्सकको उस्तै मोह छ । युरोपका विभिन्न देशसहित उनले अमेरिका, मलेसिया, सिंगापुर, चीन, भारत, दुबई, कतारलगायतका ३ दर्जन बढी देशको फन्को मारिसकेका छन् । किन घुम्छन्, डा. गिर्वाण ? भन्छन्, ‘पेशागत, व्यवसायिक र विदा मनाउने सिलसिलामा देश विदेश पुगिरहन्छ ।’ विदेश घुमघाममा रहँदा उनी नेपालसँग त्यो देशलाई कसरी जोड्न सकिन्छ भन्नेबारेमा अध्ययन पनि गर्छन् । ‘त्यहाँका पर्यटक कसरी नेपाल ल्याउने भन्ने विषयमा मन्थन गर्छु,’ उनी थप्छन् । मार्च ५,६ र ७ मा अमेरिकाको सानडियागोमा विश्वभर छरिएर रहेको हेल्थ इन्स्योरेन्स र विश्वभरका हेल्थकेयर प्रोभाइडरहरुको कुम्भमेलामा नेपालको मेडिकल टुरिज्म चिनाउने हेतुले आफ्नो हस्पिटल र नेपालको प्रतिनिधीत्व गरेर डा. गिर्वाण सहभागी हुँदैछन् ।
५. फुडप्रेमी
डा. गिर्वाणको व्यक्तिगत जीवन आनन्ददायक छ । बिरामी सेवाबाहेक उनी आफ्ना लागि पनि कुस्त समय म्यानेज गर्छन् । ‘न दौडधुप न तनाव’ यो थोरै चिकित्सकहरुको जीवनमा उपलब्ध हुन्छन् । डा. गिर्वाण कामका लागि मरिहत्ते गर्दैनन् । खानाका सौखिन उनी लेजर टाइममा विभिन्न रेष्टुरेन्टहरु धाइरहेका हुन्छन् । ‘मैले धेरैजसो रेष्टुरेन्टका स्वाद चाखिसकेको छु,’ उनले सुनाए । उनी लाइभ म्युजिकको वातावरणमा साथीहरुसँग ह्याङआउट गरिरहेका हुन्छन् । सजिलै साथी बनाउन सक्ने खुबीका संगीतका पारखी हुन् । हरेश शनिबार फुटसलमा रमाउने उनी हरेक साँझ जिम जान्छन् । खोजमूलक पुस्तक पढ्न रुचाउने उनी संसारमा भइरहेका नवीनतम मेडिकल अन्वेषणका बारेमा अपडेट रहन्छन् ।
६. समाजसेवा
डा. गिर्वाणको रुचि समाजसेवामा पनि छ । उनले श्रीद्धि फाउण्डेसनमार्फत सामाजिक कामहरु अगाडि बढाइरहेका छन् । जसले रक्तदान, न्यानो कपडा वितरणदेखि स्वास्थ्य शिविरहरु पनि गर्दै आएको छ । श्रीद्धि फाउण्डेसनले डोल्पाको विकट वस्तीसम्म पुगेर सामाजिक कामहरु गरिसकेको छ । त्यसबाहेक उनी लायन्स क्लबमार्फत पनि सामाजिक काममा सक्रिय छन् । पासपोर्ट हराएका, पर्स चोरी भएकालगायत समस्यामा परेका विदेशीहरुलाई निःशुल्क उपचारलगायतका सहयोग गरेका छन् । ‘सामाजिक कामहरुमा सक्रिय रहँदा मलाई स्वर्गीय आनन्द प्राप्त हुन्छ,’ उनी अनुभव साट्छन्, ‘सन्तानले आफ्नो नाम गर्वसाथ लिउन, राति आनन्दले निन्द्रा परोस ।’
