दमक—झापास्थित बीएण्डसी अस्पतालले ‘मेरो बीएण्डसी, मेरो जीवन साथी’ स्वास्थ्य सदस्यता कार्ड वितरण घोषणा कार्यक्रम सम्पन्न गरेको छ । कार्यक्रममा अस्पतालका निर्देशक दुर्गा प्रसाईले बीमा झापाका लागि मात्र नभएर देशभरका नागरिकलाई प्रभावकारी रहेको बताए ।
उनले स्वास्थ्यजस्तो महत्वपूर्ण विषयमा हेलचेक्रयाइ नगर्न आग्रह गरे । ‘मेरो बीएण्डसी, मेरो जीवन साथी’ स्वास्थ्य सदस्यतामा आवद्ध हुनका लागि सदस्यता शुल्क ६ हजार लाग्ने अस्पतालले जनाएको छ । ६ हजार शुल्क तिरेर सदस्य भएपछि बीएण्डसीबाट ५० हजारसम्मको स्वास्थ्य सुविधा पाइनेछ ।
यो परिवारको चार सदस्यको लागि मात्र हुनेछ । चार सदस्यभन्दा बढी भएमा सदस्यता शुल्क थप गर्नुपर्ने अस्पतालले जनाएको । ‘सदस्यता थप गर्दा प्रतिव्यक्ति १ हजार ७ सय ५० रुपैयाँ लाग्नेछ,’ अस्पताल प्रशासनले भन्यो, ‘होलबडी चेक गर्ने स्वास्थ्य सदस्यता लिनुपरेमा १५ हजार ५ सय रुपैयाँ लाग्नेछ । यस भित्र पनि परिवारको एक जनाले मात्र होलबडी चेक गर्न पाउनेछन् ।
‘मेरो बीएण्डसी, मेरो जीवन साथी’ स्वास्थ्य सदस्यताअन्तर्गत इमर्जेन्सी (सबै सेवा), ओपिडी, कस्मेटिक बाहेकका, आर्इपीडी, रेडियोलोजी र शल्यक्रिया सेवा पाइनेछ । उपचारका लागि औषधि यस कार्यक्रमअन्तर्गत समावेस नभएको अस्पतालले जनाएको छ । प्याथोलोजीअन्तर्गत बाहिरी देशमा गरिने सेवा पनि कार्यक्रममा समेटिएको छैन ।
‘मेरो बीएण्डसी, मेरो जीवन साथी’ कार्यक्रममा आवद्ध भएका सदस्यहरुले स्वास्थ्य सेवा लिन अस्पतालले निर्धारण गरेको रेडियोलोजी र प्याथोलोजी सेवा मात्र उपलब्ध हुनेछ । बिरामी पक्षबाट चेकजाँच, एमआरआई, सिटिस्क्यानजस्ता परिक्षण आफु खुसी गर्न नपाइने अस्पतालले जनाएको छ ।