श्रीमान प्रमुखज्यू
राष्ट्रिय ट्रमा सेन्टर
महाकाल, काडमाडौं ।
विषयः यथास्थितीबारे जानकारी ।
महोदय,
मिति २०७८/१०/२३ गतेमा वर्न एण्ड सर्जिकल वार्डमा भर्ना भएर एक महिनापछि डिस्चार्ज भइरहँदा यस संस्थाको यथास्थितीबारे केही कुरा जानकारी गराउन गइरहेको छु । सर्वप्रथम यस वार्डमा कार्यरत सम्पूर्ण डाक्टर, नर्सहरुलगायत अन्य कर्मचारीले देखाउनु भएको साथ, सहयोग र समर्पणप्रति कृतज्ञता ज्ञापन गर्न चाहन्छु ।
अस्पताल भनेका मन्दिर हुन् । यसमा कार्यरत कर्मचारीहरु भगवानका रुप हुन । तसर्थ, सरकारी अस्पतालको मुख्य उद्देश्य नै जनतालाई सस्तो र सुलभ सेवा प्रदान गर्नु हो । तर, बिडम्बना केही कर्मचारीमा (३० प्रतिशत) सेवाको भावभन्दा पनि पारिश्रमिक केन्द्रीत रहेको पाइयो ।
सरकारी अस्पतालप्रति सर्वसाधारण जनताहरुमा रहेको दृष्टिकोण निकै नकारात्मक भएको र यसको ज्वलन्त उदाहरण यसै वार्डमा देख्न पाइयो । कमी—कमजोरी प्रत्येक व्यक्ति र संस्थामा हुने हुँदा त्यस्ता कमी कमजोरी खोजीनीति गरी क्रमिक रुपमा सुधार गरेर अघि बढ्दा नै संस्थाको लागि फाइदाजनक हुन्छ । स्वास्थ्य जस्तो संवेदनशील क्षेत्रमा गरिने साना तिना लापरवाहीले गर्दा पनि ठूलै मुल्य चुकाउनुपर्ने हुन्छ ।
बिरामी र कुरुवालाई पीडामाथि पीडा, दुःखमाथि दुःख थप्नुभन्दा साथ, सहयोग र सान्त्वना, हौसला, हिम्मत दिनु सान्दर्भिक हुन्छ । यस वार्डको मुख्य समस्याका रुपमा केही कर्मचारीहरुको मौखिक आचरण निकै कठोर, असोभनिय र मर्यादाहीन रहेको छ ।
बिरामी पीडामा छटपटि रहँदा गरिने ढिलासुस्ती साह्रै पीडादायक र मार्मिक अनुभूतिका रुपमा लिएको छु । कर्मचारीले आफ्नो काममा गर्ने अल्छीपना दिनहुँजस्तो देख्ने गरेको छु । अप्रेसनका क्रममा आवश्यकताभन्दा बढी सामाग्री मगाउने र बढी भएका सामाग्री फिर्ता नदिने गरेको गुनासो चौतर्फी सुन्न आइरहेको छ ।
अन्तमा, अब उप्रान्त यस अस्पतालमा नआउने बाचा गर्दै सम्भव भए घाउमा नुन नछर्की (आगोमा घिउ नथपी) मलमपट्टी लगाउने काम गर्न विनम्र अनुरोध गर्दछु । मात्र आफ्नो बोलीमा मिठास कायम गरी सोझा र दुःखी बिरामीको मर्मलाई बुझी साथ, सहयोग, आशा, भरोसा, सान्त्वना, हौसला र हिम्मत प्रदान गरिदिनुहुन आग्रह गर्दछु ।
साथै, कर्मचारी गतिविधीबारे मुल्यांकन गर्ने नियांमक निकायको अग्रसरता वृद्धि गर्न पहल गर्नुहोस् ।
बिरामी कुरुवा
किरण लामा
आईपी नम्बरः १३१४९५
