काठमाडौं—विश्व मिर्गौला दिवसको अवसरमा स्वास्थ्य अभियान नेपालले ११ औं नेपाल प्रत्यारोपण खेलकूद आयोजना गर्ने भएको छ । २७ फागुनमा विश्व मिर्गौला दिवसको अवसर पारेर अखिल नेपाल फुटबल संघको फुटबल मैदानमा नेपाल प्रत्यारोपण खेलकुद, अन्तरक्रिया कार्यक्रम, निःशुल्क मिर्गौला परीक्षण तथा अंगदान शिविर संचालन हुने आयोजकले जनाएको छ ।
नेपाल प्रत्यारोपण खेलकुदअन्तर्गत प्रत्यारोपित तथा अंगदाताको टोली र चिकित्सक, नर्स, पत्रकार, कलाकार, समाजसेवीलगायत टोलीबीच मैत्रीपूर्ण फुटबल प्रतियोगिता हुनेछ । विजेता टिम र उत्कृष्ट फुटबलरलाई नगद पुरस्कारको व्यवस्था समेत गरिएको छ ।
कार्यक्रममा नेपालमा पहिलो पटक दोस्रो मिर्गौला प्रत्यारोपण गर्ने, कलेजो प्रत्यारोपण गर्ने, दुई परिवारबीच साटासाट गरी मिर्गौला प्रत्यारोपण गर्ने, मस्तिष्क मृत्युबाट प्राप्त अंगदानबाट प्रत्यारोपण गर्ने र अंगदाता तथा तीनका परिवारलाई विशेष सम्मान गर्ने कार्यक्रम रहेको छ ।
कोभिड—१९ लाई ध्यानमा शुभचिन्तक र विशेष गरी प्रत्यारोपितहरुलाई सामाजिक दूरी कायम गरेर कार्यक्रममा भाग लिन आव्हान
आयोजकले गरेको छ ।
अंग प्रत्यारोपितहरु पनि अरु व्यक्ति सरह स्वस्थ र सक्षम छन् र सबैले अंगदान गर्न सके कोही पनि अंग फेल भएका व्यक्तिहरु अकाल मृत्युको शिकार बन्न पर्दैन भन्ने सन्देश दिन प्रत्येक वर्ष प्रत्यारोपण खेलकुदको आयोजना गरिंदै आएको छ ।
यसपटकको विश्व मिर्गौला दिवस ‘मिर्गौला रोग लागे पनि राम्ररी जिऊ’ भन्ने नाराका मनाइदैंछ ।
