काठमाडौं– प्रधानमन्त्री केपी शर्मा ओलीले आफू स्वास्थ्य परीक्षण र हल्का उपचारका लागि सिंगापुर जान लागेको बताएका छन् । गृह मन्त्रालयमा बुधबार बिहान आयोजित संविधान दिवस राष्ट्रिय दिवस, मूल समारोह समितिको बैठकमा ओलीले आफ्नो स्वास्थ्य अवस्थाको बारेमा अफवाह फैलाइएको भन्दै चर्को असन्तुष्टी व्यक्त गरे ।
‘म केही दिनका लागि भोली सिंगापुर जाँदैछु । अचम्म लाग्छ, विरोधीहरु कति कमजोर भएछन्, उ बाँचोस तै पनि मुकाबिला गर्छौैं भन्ने छैन् । मरीहाले देखि हुन्थ्यो भनेर । मलाई त्यस्ता प्रवृतिहरुसँग केही भन्नु छैन । तर म स्वास्थ्य परीक्षण र हल्का उपचारका लागि जाँदैछु,’ प्रधानमन्त्रीले भने ।
उनले आगामी चुनाबमा तीब्र प्रतिष्प्रर्धा हुने भन्दै अस्तित्वको लडाइ समेत सुरु भएको दाबी गरे । ‘आउँदो चुनाव पनि सामना गर्न तयार भएर बस्न म त्यस्तो चाहनेहरुलाई भन्न चाहन्छु । मरीगए हुन्थ्यो भन्ने चाहनेलाई । आउँदो चुनाव टफ हुनेछ । अस्तित्व रक्षाको लडाईं अहिले देखि सुरु गरे हुन्छ,’ ओलीले भने ।
उनले आफूलाई केहीले मरीहालोस भनेर खुबै प्रचार गरेको उल्लेख गर्दै एक पटक सबैले मर्नुपर्ने बताए । प्रधानमन्त्री ओलीले थपे, ‘मैले अस्ती एक ठाउँमा भनेको थिएँ १५ बर्ष अगाडि बिमारी थिए । बिमारी त्यतिबेला थिएँ । अब १५ बर्ष अखडामा सामेल छु । बाँकी १५ वर्ष चाहिँ अखडामा हुन्छु म । ’
ओलीले आफू संविधान दिवसभन्दा अगावै स्वदेश फर्किने बताए ।
