महेन्द्रनगर—कञ्चनपुरको महेन्द्रनगरमा रहेको महाकाली अस्पताललाई सुदूरपश्चिम प्रदेशको उप—प्रादेशिक अस्पताल बनाइने भएको छ ।
सुदूरपश्चिम प्रदेशका सामाजिक विकासमन्त्री कृष्णराज सुवेदीले बिहीवार महाकाली अस्पतालको विस्तार स्वास्थ्य सेवा (ईएचएस) कार्यक्रमलाई उद्घाटनका क्रममा सो जानकारी दिएका हुन् ।
उनले महाकाली अस्पताललाई सुदूरपश्चिम प्रदेशको उप–प्रादेशिक अस्पतालका रूपमा रूपान्तरण गरिने बताए । ‘महाकाली अस्पताललाई सुदूरपश्चिम प्रदेशको उप—प्रादेशिक अस्पतालका रूपमा रूपान्तरण गर्ने योजना बनाइएको छ,’ उनले भने, ‘अस्पताललाई १ सय ५ शैय्याको अस्पतालका रूपमा स्तरोन्नती गरिनेछ ।’
मन्त्री सुवेदीले आउँदो वैशाखभित्र नै अस्पतालमा प्रयोगविहीन अवस्थामा रहेको आईसीयु मेसिनलाई सुचारु गरिने बताएका छन् । साथै, उनले बिहीबार नै अस्पतालको विस्तारित स्वास्थ्य सेवा (ईएचएस)को उद्घाटन समेत गरेका छन् ।
सो क्रममा उनले अस्पतालको सेवा सहज रूपमा सञ्चालन गरी जनतालाई सर्वसुलभ तरिकाले सेवा दिने र अस्पतालमा कुनै पनि प्रकारको राजनीतिक दबाब हुन नदिने प्रतिवद्धता जनाए ।
अस्पतालको सेवा सुचारु गर्न आवश्यक पहल गर्दै बजेटमा कुनै पनि प्रकारको कमी हुन नदिने समेत मन्त्रीको सुवेदीको भनाइ थियो ।
