धनगढी—डडेल्धुरा अस्पतालमा विशेषज्ञ चिकित्सक आएपछि केहि राहत भएको छ । समायोजनसँगै चिकित्सकबिहिन जस्तै बनेको डडेल्धुरा अस्पतालमा विशेषज्ञ चिकित्सक आएसँगै अस्पतालको सेवा सुविधामा विस्तार भएको हो ।
अस्पतालमा विशेषज्ञ सेवा पाउन थालेपछि सुदूरपश्चिमका पहाडी जिल्ला डडेल्धुरासहित बैतडी, दार्चुला, डोटी, बझाङलगायतका जिल्लाका बिरामीलाई उपचारका लागि सहज भएको छ ।
सुदूरपश्चिम प्रदेशमै संघीय सरकारको मातहत रहेको एक मात्र डडेल्धुरा अस्पतालमा चिकित्सकको अभावका कारण सेवा सुविधा खस्कदैं गएका बेला नेपाल सरकार स्वास्थ्य तथा जनसंख्या मन्त्रलायले छात्रवृतितर्फका चार जना विशेषज्ञ चिकित्सक पठाएको छ ।
अस्पतालमा हाल ९ जना विशेषज्ञ चिकित्सक रहेका छन् । जसमा दुई जना स्त्रीरोग विशेषज्ञ, एक जना हाडजोर्नी, एक जना जनरल फिजिसियन, एक जना दन्तरोग, एक जना एनेस्थेसिया, दुई जना बाल रोग र एक जना एमडीजीपीसहित ९ जना विशेषज्ञ चिकित्सक रहेका छन् ।
विशेषज्ञ चिकित्सक आएसँगै हाड जोर्नी, बालरोग ,महिला तथा प्रसुती रोग, एन्डोस्कोपी सहित जनरल शल्यक्रिया सेवा सुचारु भइसकेको अस्पतालका निमित्त मेसु जगदीशचन्द्र विष्टले बताए । ‘उहाँहरु भर्खरै आएकाले अस्पतालका केही अन्य सेवा अवरुद्ध सेवापनि छिट्टै सुचारु हुन्छन्,’ उनले भने ।
सुदूरपश्चिमका पहाडी जिल्लामा सबैभन्दा बढी समस्याका रुपमा रहेको हाडजोर्नीका लागि विशेषज्ञ चिकित्सक आइसकेकाले अबका केही दिनमै हाडजोर्नीको शल्यक्रिया सेवा पनि संचालनमा आउने समेत अस्पताल प्रशासनले जनाएको छ ।
मन्त्रिपरिषद्को गत २०७५ फागुन ३ गतेको निर्णयअनुसार डडेल्धुरास्थित उपक्षेत्रीय अस्ताललाई विशेषज्ञसहितको सुविधा प्रदान गर्नेगरी स्तरोन्नती गर्ने निर्णय गरिएको थियो । हाल डडेल्धुरा अस्पतालमा २० जना विशेषज्ञ चिकित्सक, १९ जना मेडिकल अफिसर, ३० स्टाफ नर्ससहित नेपाल सरकार तर्फबाट १ सय ९ जनाको दरबन्दी रहेको छ ।
