बुहानका १९० नेपाली नियमित सम्पर्कमा, ल्याउनुपर्ने अवस्था आए सरकार तयार

काठमाडौं—नोवल कोरोना भाइरसको इपिसेन्टर मानिएको वुहान प्रान्तमा रहेका १ सय ९० नेपाली सम्पर्कमा आएको स्वास्थ्य तथा जनसंख्या मन्त्रालयले जनाएको छ । उनीहरु चीनस्थित नेपाली दूतावासले बनाएको ‘ह्वाटसएप ग्रुप’मा नियमित सम्पर्कमा रहेका छन् ।

इपिसेन्टरमा रहेका नेपालीलाई जुनसुकै समयमा स्वदेश फर्काउनुपर्ने अवस्था आउन सक्ने भन्दै स्वास्थ्य तथा जनसंख्या मन्त्री भानुभक्त ढकालले बिहिवार विभिन्न मन्त्रालयका उच्चस्तरीय अधिकारीहरुसँग छलफल गरेका छन् ।

एकै पटक त्यति धेरै संख्यामा नेपालीलाई फर्काउनु परे उनीहरुको निगरानी कसरी गर्ने भन्ने विषयमा पनि छलफल भएको सहभागी मन्त्रालयका प्रवक्ता महेन्द्रप्रसाद श्रेष्ठले बताए । छलफलमा उनीहरुलाई ल्याएर राख्न नेपाली सेनाको अस्पतालमा बनेको नवनिर्मित भवनलाई पहिलो प्राथमिकतामा राखिएको छ । त्यसैगरी, शुक्रराज अस्पताल र अन्य हव अस्पताललाई पनि तयारी रहन निर्देशन दिइसकेको उनले बताए ।

मन्त्री ढकालले बोलाएको उच्चस्तरीय बैठकमा रक्षा, परराष्ट्र, पर्यटन र अर्थ मन्त्रालयका सचिवहरु, अध्यागमनका महानिर्देशक, गृह मन्त्रालयका इमरर्जेन्सी महाशाखा हेर्ने सह—सचिव, भन्सार विभागका महानिर्देशक, सैनिक अस्पताल छाउनीका निर्देशकलगायत स्वास्थ्य मन्त्रालयका सबै महाशाखा प्रमुखहरुको उपस्थिती रहेको थियो ।