काठमाडौं—नेपालमा मिर्गौला प्रत्यारोपण सुरु भएको ११ वर्षमा १० जनामा दोस्रो पटक सफल प्रत्यारोपण भएको छ । पहिलो पटक प्रत्यारोपण गरेको मिर्गौैलाले करिब १२ वर्षपछि क्रमशः काम गर्न छाड्छ ।
मिर्गौलाको काम गर्ने क्षमतामा ह्रास आएपछि नियमित डायलाइसिस वा पुन प्रत्यारोपणमा जानु पर्छ । शिक्षण अस्पताल महाराजगञ्जका डा. प्रेमराज ज्ञवालीका अनुसार पहिलो प्रत्यारोपण गरिएका तर पुनः मिर्गौलाले काम गर्न छाडेपछि दोस्रो पटक प्रत्यारोपण १० जनामा गरिएको छ ।
शिक्षण अस्पतालमा ८ जनाको भएको छ भने शहिद धर्मभक्त राष्ट्रिय प्रत्यारोपण केन्द्रमा दुई जनाको भएको छ । नेपालमा पहिलो पटक ८ अगस्ट २००८ मा त्रिवि शिक्षण अस्पतालमा मिर्गौलाको प्रत्यारोपण सुरु भएको थियो । त्यसको नेतृत्व डा. दिव्यासिंह साहले गरेकी थिइन ।
त्यस्तै, नेपाल सरकारले अंग प्रत्यारोपणका लागि मात्रै भनेर भक्तपुरमा शहिद धर्मभक्त राष्ट्रिय प्रत्यारोपण केन्द्र स्थापना गरी ६ माघ ०६९ देखि मिर्गौला प्रत्यारोपण सेवा सुरु ग¥यो ।
रोकियो मिर्गौला प्रत्यारोपण
भक्तपुरमा शहिद धर्मभक्त राष्ट्रिय प्रत्यारोपण केन्द्रमा भने २० दिनदेखि प्रत्यारोपण सेवा ठप्प भएको छ । इथिकल कमिटिका सदस्यले प्रत्यारोपी व्यक्ति सिफारिसमा सही गर्न नमानेपछि सेवा रोकिएको छ ।
सानेपास्थित निदान अस्पतालमा मिर्गौला तस्करी भएको विषयले सिफारिस समितिका सदस्यले सही गर्न नमानेपछि सो केन्द्रको सेवा ठप्प भएको हो । केन्द्रमा अहिले ६० जना बिरामी प्रत्यारोपणको प्रतीक्षामा छन् ।
काठमाडौका प्रमुख जिल्ला अधिकारी जनकराज दाहालका अनुसार अहिले कुनै पनि अस्पतालमा प्रत्यारोपणको सिफारिस गरिएको छैन । वीर अस्पताल, शिक्षण अस्पताल र ग्राण्डी अस्पतालमा भने सेवा सञ्चालनमा छ ।
