धनगढी-बझाङ जिल्लाको सबैभन्दा विकट साइपाल गाँउपालिकाका गर्भवती तथा सुत्केरी महिलाका लागि गाँउपालिकाले अण्डा र झण्डा वितरण गरेको छ ।
आमा सुरक्षा कार्यक्रमअन्तर्गत गाँउपालिकाको आर्थिक सहयोगमा गाँउपालिकाका गर्भवती तथा सुत्केरी महिलालाई गर्भ जाँच गराए बापत र स्वास्थ्य संस्थामा सुत्केरी भए बापत कुखुराको अण्डासँगै आयोडीनयुक्त नुन वितरण गर्ने कार्यक्रम तय गरिएको साइपाल गाँउपालिकाका स्वास्थ्य संयोजक लोकेन्द्र जेठाराले बताए ।
गाँउपालिकाका सबै सुत्केरी तथा गर्भवती महिलाहरु स्वास्थ्य संस्थामा सुत्केरी गराउन नआउने परिपाटीको अन्त्य गर्ने र आमा र शिशुको स्वास्थ्य स्वस्थ राख्ने उदेश्यले कार्यक्रम तय गरिएको बताइएको छ ।
गर्भावस्थामा ४ पटक चेकजाँच गराए बाफत पटकैपिच्छे ६ वटा अण्डाका दरले वितरण गर्ने र सुत्केरी भएको बेला पाँच वटा अण्डा, सुत्केरी भएको तीन दिन र एक हप्तापछि पुन चेक जाँच गराए वाफत ५।५ वटा अण्डाका दरले स्वास्थ्य संस्थाबाट उपलब्ध गराउने गरिएको छ ।
गर्भ जाँचदेखि सुत्केरी भएसम्म एक महिलाले ३९ अण्डा पाउने ब्यवस्था छ । यसरी स्वास्थ्य संस्थामा अण्डा उपलब्ध गराउन थालेपछि गर्भ जाँच गराउनेको संख्यामा वृद्धि भएको छ ।
