काठमाडौं—एपेन्डिसाइटिसको शल्यक्रियापछि मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचाररत प्रधानमन्त्री केपी शर्मा ओली डिस्चार्ज भएका छन् । बिहीबार दिउँसो प्रधानमन्त्रीको स्वास्थ्य अवस्था सामान्य भएपछि उनलाई डिस्चार्ज गरिएको चिकित्सकहरुले बताएका छन् ।
डिस्चार्ज भएपछि प्रधानमन्त्री ओलीले सञ्चारकर्मीहरुलाई संक्षिप्त प्रतिक्रिया दिदैं भने, ‘म स्वास्थ्यमा सुधार भएर घर जाँदैछु ।’ प्रधानमन्त्रीको उपचार संलग्नमध्येका एक चिकित्सक प्रा.डा. अरूण सायमीले प्रधानमन्त्रीको शल्यक्रिया सफल भएको प्रतिक्रिया दिए ।
ओली बिहीबार अपरान्ह अस्पतालबाट डिस्चार्ज भएका हुन् । अस्पतालले एक विज्ञप्ति जारी गर्दै प्रधानमन्त्रीको स्वास्थ्य लाभ भएकाले केही दिन आराम गर्ने सुझावसहित डिस्चार्ज गरिएको जनाएको छ । ‘उपचारमा संलग्न चिकित्सकहरुकाअनुसार हाल सम्माननीयज्यूको स्वास्थ्य लाभ भएकाले केही दिन आराम गर्ने सुझावसहित उहाँलाई आज मिति २०७६/०८/१९ गते दिन अस्पतालबाट डिस्चार्ज गरिएको छ ।’
प्रधानमन्त्री डिस्चार्ज हुनुअघि स्वास्थ्य अवस्था बुझ्न राष्ट्रपति विद्यादेवी भण्डारी अस्पताल पुगेकी थिइन् । डिस्चार्जपछि प्रधानमन्त्री वालुवाटारस्थित निवासमै आराम गर्ने भएका छन् । प्रधानमन्त्रीले चिकित्सकहरूसँग निवासमै आराम गर्ने चाहना व्यक्त गरेपछि उनलाई डिस्चार्ज गरिएको हो ।
प्रधानमन्त्री ओलीको १० मंसिरमा मंगलबार एपेन्डिसाइटिसको शल्यक्रिया गरिएको थियो । शल्यक्रियापछि त्यसको संक्रमण देखिएपछि उनलाई अस्पतालको सघन कक्षमा राखेर उपचार गरिएको थियो ।
अस्पतालमा रहँदा प्रधानमन्त्री ओलीको हेमोडाइलाइसिस समेत गरिएको थियो ।
