बुटवल –‘चाहिए जति लानुहोस्’ लेखिएको बक्स स्वास्थ्य संस्थामा छिर्नासाथ देखिन्छ । युवा पुस्तादेखि वयस्क सबैले आफूलाई आवश्यक मात्रामा कण्डम लाने पनि गरेका हुन्छन् । तर, कपिलवस्तुको शिवराज नगरपालिकाका स्वास्थ्य संस्थामा भने बक्स छ तर कण्डम छैनन् ।
विगत १५ दिन यता नगरको वडा नं. ११ मा रहेको थुनुवा स्वास्थ्य चौकीमा कण्डम अभाव देखिएको छ । सरकारले नि:शुल्क रुपमा उपलब्ध गराउने कण्डम स्वास्थ्य चौकीमा नहुनु संस्थाको लापरवाही भएको स्थानीयको बुझाई छ ।
‘१५ दिनदेखि कण्डम छैन, नगरपालिकासँग माग गरेका छौँ । अझै सम्म पनि उपलब्ध भएको छैन,’–स्वास्थ्य चौकी प्रमुख राजेश कुँवरले भने, ‘सेवा ग्राही कण्डम लिन दिनहुँ आउने भए पनि छैन भनि फर्काउनु परेको छ । स्वास्थ्य संस्थामा कण्डम समेत छैन भन्नु पर्दा लाज मर्दो भएको छ ।’
वडाको स्वास्थ्य चौकीमा कन्डमको मात्र समस्या छैन् । समान्य औषधी समेत स्वास्थ्यसंस्थामा नभएको सेवाग्रहीहरु गुनासो गर्दछन् । ‘अरु कुरा त के गरौँ र त्यहाँ गएर सिटामोल पाउँदैन्’, स्थानीय हरिलाल यादव भन्छन्, ‘सामान्य टाउको दुखाइको औषधी लिन जादाँ समेत पाइदैन् ।’
एक हप्तादेखि अस्पतालमा सिटामोल समेत छैन् । जसका कारण बिरामीहरु प्रत्यक्ष प्रभावित भएका छन् । ‘स्वास्थ्य चौकीमा सिटामोल सकिएको पनि एक हप्ता भयो, स्वास्थ्य चौकी प्रमुख कुवँरले भने, ‘अब औषधी नै छैन विरामीलाई कहाबाट उपलव्ध गराउने । हामीले स्वास्थ्य शाखामा औषधी माग गरेको पनि धेरै भयो औषधी आउँदैन् ।’
नगरपालिकाले भने सवै क्षेत्रमा त्यस्तो समस्या नरहेको बताउँदै आएको छ । ‘सबै स्वास्थ्य चौकीहरुमा कण्डम अभाव होइन् झन औषधी त केहिमा मात्रै नभएको होला, स्वास्थ्य शाखा प्रमुख चुडामणी भट्टाईले भने, ‘त्यसको तुरुन्त समाधान हुन्छ ।’
नगरपालिकाले कण्डम खरिद नगर्ने र केन्द्रबाट नै खरिद भइ जिल्लामा आउने गर्दछ । स्वास्थ्य चौकीको मागअनुसार जिल्ला जनस्वास्थ्यबाट ल्याउनु पर्ने भएकोले प्रकृया सुरु भइसकेको उनले बताए । आफू भर्खरै स्वस्थ्य शाखामा आएकोले के कति स्टोकमा औषधीहरु कुन कुन छ भन्ने बारे पनि डाटा तयार नहुँदा समस्या भएको उनले बताए ।
