धनगढी-कैलालीको गोदावरी नगरपालिका ३ चौकिडाँडामा रहेको मालाखेती अस्पतालमा आइतबारदेखि आकस्मिक सेवा सुरु भएको छ । गोदावरी नगरपालिका मातहत रहेको यस क्षेत्रको पूरानो सरकारी अस्पताल मालाखेती अस्पतालमा आउने बिरामीहरुको स्वास्थ्य सेवालाई मध्यनजर गर्दै आइतबारदेखि २४ सै घण्टाका लागि आकस्मिक सेवा सुरु गरिएको हो ।
गोदावरी नगरपालिका स्वास्थ्य शाखाका विष्णु जोशीका अनुसार अस्पतालमा अनिवार्य हुनुपर्ने आकस्मिक सेवा सुचारु गरी यस क्षेत्र बिरामीहरुलाई २४ सै घण्टा सेवा दिनका लागि आइतबारदेखि सेवाको सुरुवात गरिएको हो । स्वास्थ्य उपचारका लागि कैलालीसहित कञ्चनपुरको कृष्णपुरबाट समेत बिरामीहरु आउने मालाखेती अस्पतालमा बिरामीहरुले अब जुनसुकै समयमा पनि उपचार गर्न पाउने जोशीले जानकारी दिए ।
उनले हाल अस्पतालमा रहेका चार जना विशेषज्ञ डाक्टरहरुले बिरामीलाई दिन रात २४ सै घण्टा सेवा दिने बताए । यसअघि आकस्मिक सेवा नहुँदा रातिको समयमा टाढा-टाढा आउने बिरामीहरुलाई अन्यत्रै पठाउने गरेको भएपनि अब भने २४ सै घण्टा सेवा उपलब्ध रहेको उनले बताए । अहिले मालाखेती अस्पतालमा आकस्मिक सेवासँगै आमा सुरक्षा कार्यक्रम, ईसीजी सेवा , ल्याब सेवा रहेको अब विस्तारै अन्य सेवा सुबिधाहरु पनि थपिदै जाने जोशीले बताए ।
सरकारी अस्पताल भनेर टाढावाट आउने बिरामीहरुलाई कसरी सहज र सरल तरिकाले सेवा दिन सकिन्छ भन्ने तर्फ आफूहरुले अस्पतालको ब्यबस्थापन सुधार गर्दै गइरहेको उनको भनाइ छ ।
