काठमाडौ—सरकारले नीजि मेडिकल कलेजलाई शुल्क फिर्ता गर्न दिएको १५ दिनको समयसीमा आज सकिदैंछ । तर, कलेजहरुले रकम फिर्ता गर्ने विषयमा अझै निर्णय लिएका छैनन् ।
शिक्षा मन्त्रालयले कात्तिक २४ गते सूचना जारी गरी १५ दिन अर्थात मंसिर ७ गतेभित्र बढी लिएको भए शुल्क फिर्ता वा समायोजन गर्न निर्देशन दिएका थिए । समयसीमा भित्र रकम फिर्ता वा समायोजन नगरे ठगी मुद्धा चलाउने सरकारको तयारी छ ।
यस बीचमा त्रिवि उपकुलपति प्रा.डा. धर्मकान्त बाँस्कोटाले पनि विद्यार्थीहरुलाई विभिन्न चरणमा भेटेका छन् । उनले विद्यार्थी र अभिभावकको सहमती बिना रकम लिएको कुनै प्रमाण भए जिल्ला प्रशासनमा उजुरी हाल्न भनेका छन् । सहमतीमा कलेजले रकम लिएको प्रमाण भए विद्यार्थी नै कमजोर हुने भनेपछि केही विद्यार्थी हच्किएका छन् ।
डा.बाँस्कोटा कलेज, सरकार र विद्यार्थी तीन निकायको कमजोरी भएको बताउँछन् । त्रिभुवन विश्वविद्यालय र केयुले शुल्क तोकेर विद्यार्थी भर्ना भएपछि मात्रै सरकारले औपचारिक रुपमा शुल्क तोक्दै आएको छ । यसले पनि समस्या ल्याएको त्रिवि स्रोत बताउँछ । मन्त्रालयले यसअघि गत चैत र दसैंअघि पनि शुल्क फिर्ता गर्न निर्देशन दिएको थियो ।
तर, कलेज प्रशासन रकम फिर्ता गर्ने सोचमा देखिएको छैन् । विद्यार्थीहरुले रिले अनशनसहितको धर्ना कार्यक्रम जारी राखेका छन् ।
