काठमाडौं—वन तथा वातावरणमन्त्री ऐनबहादुर शाही ठकुरीले राजावादी आन्दोलनकारीहरुको आगजनीका कारण क्षतिग्रस्त भएको सरकारी जडिबुटी उत्पादन तथा प्रशोधन कम्पनीलाई केही दिनभित्रै सञ्चालनमा ल्याउने बताएका छन् । बिहीबार निरिक्षणका लागि जडिबुटीस्थित कम्पनी पुगेका मन्त्री शाहीले १० करोड रुपैयाँले अस्थायी रुपमा सञ्चालन गर्न सकिने बताउँदैं तत्काल सबै प्रक्रिया पूरा गरेर सञ्चालनमा ल्याइने बताए ।
‘व्यवस्थापन र अन्य टोलीले तत्काल सञ्चालन गर्न कति लाग्न सक्छ भनेर सल्लाह गर्यौं । करिब १० करोड बराबरको रकम भयो भने अस्थायी रुपमा यसलाई सञ्चालन गर्न सक्छौं भन्ने आएको छ,’ उनले भने, ‘त्यो नेपाल सरकारको मन्त्रिपरिषद्मा छलफल भइसकेको अवस्था छ, प्रक्रियागत रुपमा अगाडि बढ्दैंछौं ।’
१५ चैतमा आगलागी भएको दिनबाट जडिबुटी प्रशोधन तथा उत्पादन कम्पनीका कर्मचारीहरुले बेरोजगार महसुस गरेको उनले बताए । ‘यहाँका कर्मचारी साथीहरुले जुन दिनबाट यहाँ क्षति पुग्यो, त्यो दिनबाट बेरोजगार भएको महसुस गर्नुभएको छ,’ उनले भने, ‘उहाँहरुलाई काममा जोड्नका लागि पनि हामीले केही दिनभित्रै सबै प्रक्रिया पूरा गरेर सञ्चालन गर्ने प्रक्रिया अगाडि बढाउँछौं ।’
आगजनीका कारण पुगेको क्षतिका कारण तत्कालै काम चलाउन पनि गाह्रो भइरहेको उल्लेख गर्दै उनले संघीय सहरी विभागले प्रारम्भिक मुल्यांकन गरिरहेको बताए । ‘मर्मत सम्भार गरेर बस्न लायक बनाउने प्रक्रिया अगाडि बढेको छ,’ उनले थपे । मन्त्री शाहीकाअनुसार छिटोभन्दा छिटो सञ्चालन गर्न र क्षतिको प्रारम्भिक मुल्यांकन गर्नका लागि सम्बन्धित प्राविधिक र विज्ञहरु राखेर प्रारम्भिक मुल्यांकन गरिएको जानकारी दिए । ‘करिब २८ करोड हाराहारीमा क्षति भएको प्रारम्भिक विवरण आएको छ,’ उनले भने, ‘विस्तृतमा जाँदा भोलि घटन पनि सक्छ र बढ्न सक्छ ।’
उनले आगजनीबाट जडिबुटी कम्पनीले क्षति ब्यहोर्नुपरेको उल्लेख गर्दै आफू केन्द्रको व्यवस्थापनसँग निरन्तर सम्पर्कमा रहेको बताए ।जडिबुटी कम्पनीले हर्बलमा आधारित सन्चो, हिमालयन मसाज आयल, शिलाजित, सेनिटाइजरलगायतका उत्पादन गर्दै आएको छ ।
