काठमाडौं—भूकम्पका कारण क्षति भएको म्यानमारमा मानवीय सहायताका लागि मेडिकल राहतसहित नेपाली सेनाका २२ सदस्सीय टोली त्यसतर्फ प्रस्थान गरेको छ । बुधबार सरकारको निर्णयअनुसार मेडिकल राहतसहित नेपाली सेनाको टोली म्यानमार उडेको हो ।
नेपाली सेनाका सेनानी रामचन्द्र श्रेष्ठको नेतृत्वमा चिकित्सक, नर्स, पारमेडिक्ससहित १२ जनाको चिकित्सकीय टिम, ४ जना बन्दोबस्ती र ६ जना क्रू सदस्यसहित २२ जनाको टोली सेनामको सीएन—२३५ कासा विमानबाट म्यानमार उडेको हो ।
‘मित्रराष्ट्र म्यानमारमा गएको भूकम्पपछि नेपाल सरकारले त्यहाँ मेडिकल सहायतासहित नेपाली सेनाको २२ सदस्यीय टोली पठाएको छ,’ प्रधानमन्त्री केपी शर्मा ओलीले फेसबुकमा उल्लेख गरेका छन्, ‘टोलीमा भूकम्प प्रभावितका लागि औषधि, उपकरणहरु सहित सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरु रहेका छन् ।
टोलीले अत्यावश्यक औषधि एवं इक्वीपमेन्टसहितका मेडिकल राहत समेत लिएको छ । टोली एक सातासम्म भूकम्पबाट घाइते भएकाहरुको उपचारमा खटिने नेपाली सेनाको जानकारी दिएको छ ।
१५ चैतमा म्यानमारमा ७.७ म्याग्निच्युडको भूकम्प जाँदा ठूलो जनधनको क्षति भएको छ । हालसम्म उक्त भूकम्पमा परेर २ हजार बढीको मृत्यु भइसकेको छ । हजारौं घाइते भएको अन्तर्राष्ट्रिय सञ्चार माध्यमले जनाएको छन् ।
