काठमाडौं—चर्चित ‘सन्चो’ उत्पादन गर्ने सरकारी कम्पनी जडिबुटी उत्पादन तथा प्रशोधन केन्द्रमा लगाइएको आगोका कारण झण्डै २८ करोड रुपैयाँ क्षति भएको प्रारम्भिक विवरण प्राप्त भएको छ । कम्पनीकी प्रबन्ध उषा रिजालकाअनुसार राजवादी आन्दोलनका क्रममा गरिएको आगजनीका कारण २८ करोड बढी क्षति प्रारम्भिक आँकलन छ ।
भवनमा मात्रै झण्डै १५ करोड रुपैयाँ बराबरको क्षति पुगेको जानकारी इन्जिनियरहरुको रहेको उनको भनाइ छ । त्यसबाहेक मेसिन, प्याकिङ म्याटरियल, कच्चा पदार्थ, स्टकलगायत पनि ठूलो क्षति पुगेकाले झण्डै २८ करोड रुपैयाँ बराबरको क्षति पुगेको प्रारम्भिक अनुमान छ । विस्तृत अध्ययनमा यो आँकडामा केही तलमाथि हुन सक्ने छ ।
१५ चैतमा तीनकुनेमा भएको राजावादी आन्दोलनमा झडप भएपछि त्यहाँबाट गएको एक समूहले जडिबुटीस्थित ‘सन्चो’ उत्पादन गर्ने जडिबुटी उत्पादन तथा प्रशोधन केन्द्रमा आगजनी तथा तोडफोड गरेको थियो ।
आगलागीबाट जिएमपी बेसमा एयर फ्लोसहित बनाइएको उत्पादन गर्ने भवन र अर्को एक भवन नष्ट भएका छन् । त्यसबाहेक केन्द्रको प्रयोगशाला नष्ट भएको छ भने केही उत्पादनहरु पनि जलेर नष्ट भएको छ । झण्डै वार्षिक एक करोड सन्चो उत्पादन गर्ने क्षमता भएको नयाँ मेसिन र पुरानो मेसिन दुवै जलेका छन् ।
तोडफोडबाट प्रशासनिक भवनमा क्षति पुगेको छ भने चार वटा गाडी र एउटा मोटरसाइकलसमेत जलाइएको छ ।
जडिबुटी कम्पनीले हर्बलमा आधारित सन्चो, हिमालयन मसाज आयल, शिलाजित, सेनिटाइजरलगायतका उत्पादन गर्दै आएको छ ।
