काठमाडौं—राजावादी आन्दोलन हिंसात्मक बन्दैं गएपछि जिल्ला प्रशासन कार्यलय काठमाडौंले विभिन्न पाँच ठाउँमा कर्फ्यु जारी गरेको छ । काठमाडौंका प्रमुख जिल्ला अधिकारी ऋषिराम तिवारीले काठमाडौंका विभिन्न पाँच स्थानमा अपरान्ह ४ः२५ बजेदेखि कर्फ्यु जारी गरेका हुन् ।
जिल्ला प्रशासन कार्यलयले गौशालादेखि एयरपोर्ट, गैरीधारा, तिनकुने हुँदैं कोटेश्वरसम्म कर्फ्यु जारी गरेको छ । यसैगरी, कोटेश्वरदेखि जडिबुटी पुल, कोटेश्वरबाट बालकुमारी पुलसम्म, बानेश्वर चोकदेखि शंखमुल पुलसम्म र गौशाला चोकदेखि पूरानो बानेश्वर हुँदैं नयाँ बानेश्वर चोकसम्म कर्फ्यु लागु गरेको हो ।
कर्फ्यु राति १० बजेसम्म लागु गरेको प्रजिअ तिवारीले जनाएका छन् । यी स्थानहरुमा आवत—जावत गर्न, कुनै पनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी कर्फ्यु आदेश जारी भएको हो ।
