काठमाडौं—नेपाली कांग्रेस निकट कर्मचारीहरुको संगठन निजामती कर्मचारी युनियन स्वास्थ्य तथा जनसंख्या मन्त्रालय विभागीय समितिको अध्यक्षमा शुक्रराज ट्रपिकल तथा सरुवा रोग अस्पताल टेकुका कर्मचारी प्रदीप केसी निर्विरोध भएका छन् । गत शनिबार स्वास्थ्य तथा जनसंख्यामन्त्री प्रदीप पौडेलले अधिवेशन उद्घाटन गरेका थिए ।
सर्वसम्मत नेतृत्व चयनका लागि दुई दिनसम्मको कसरतबाट सर्वसम्मतिमा कार्यसमिति र प्रतिनिधी चयन गरेको हो । अधिवेशनको बन्दसत्रले कार्यसमिति र प्रतिनिधी छान्ने जिम्मेवारी युनियनका केन्द्रीय उपाध्यक्ष निर्मला शर्मा, उपमहासचिव इन्दु शर्मा, पुर्व उपमहासचिव विश्वबन्धु रेग्मीलाई दिएको थियो । निर्वाचन आयोगले अधिकार प्रत्यायोजित भएका व्यक्तिहरुको निर्णय बमोजिम कार्यसमिति घोषणा गरेको हो ।
घोषणा भएको समितिको खुल्ला उपाध्यक्ष खाली राखिएको छ भने महिला उपाध्यक्षमा सावित्री भट्ट, समावेसीमा डा. लालबाबु शाह, सचिव खुलामा रुपा राना, युवामा पासाङ बिसी रहेका छन् । अधिवेशनले ५ जना खुला सदस्य र २ जना श्रेणीविहिन कर्मचारीलाई कार्यसमिति सदस्य घोषणा भएको छ ।
अध्यक्षका आकांक्षीहरु धिरज रौनियार, ललनप्रसाद शाह, रामचन्द्र खड्का थिए । तर, स्वास्थ्यमन्त्री पौडेलको सचिवालयमा रहेका युनियनका पूर्व उपमहासचिव रेग्मीले आफू अनुकूलका केसीलाई बनाउन जोडबल गरेपछि तीन दिन लम्बिएर समिति घोषणा भएको थियो । आकांक्षी डा. शाहलाई समावेसी उपाध्यक्षमा ल्याइयो भने अरुलाई केन्द्रीय प्रतिनिधी बनाइएको छ । केन्द्रीय प्रतिनिधीमा रेग्मी आफूसँगै तेजबहादुर लामिछाने, शंकर पाण्डे, दीपेन्द्र सुनार, पवित्रा ढकाललगायतको नाम घोषणा भएको छ ।
