लन्डन (रोयटर्स)–गत वर्ष विश्वमा निमोनियाका कारण ८ लाखको ज्यान गएको तथ्य सार्वजनिक भएको छ । युनिसेफ, सेभ द चिल्ड्रेनलगायत स्वास्थ्य क्षेत्रमा काम गर्ने अन्य ४ संस्थाहरुले संयुक्त रुपमा सार्वजनिक गरेको रिपोर्टले निमोनियाका कारण ८ लाख शिशु तथा बालवालिकाको मृत्यु हुने गरेको देखाएको हो ।
यसलाई हेर्दा निमोनियाका कारण प्रत्येक ३९ सेकेन्डमा एक शिशुको मृत्यु हुने गरेको देखिन्छ । रिपोर्टमा निमोनियालाई ‘फरगटन इपिडेमिक’को संज्ञा दिँदै ती संस्थाहरुले यसको उपचार र रोकथाममा राज्यहरुले लगानी बढाउनुपर्नेमा जोड दिएका छन् ।
‘निमोनिया सजिलै रोकथाम र निदान गर्न सकिने रोग भएर पनि विश्वमा धेरै बच्चाहरूको मृत्यु यसैबाट भइरहेको छ । यो निकै स्तब्ध पार्ने विषय हो,’ जीएभिआई खोप गठबन्धनका प्रमुख कार्यकारी सेथ बर्कले बताए ।
गत वर्ष नाइजेरिया, भारत, पाकिस्तान, कंगो र इथियोपियामा निमोनियाका कारण मर्नेहरुमध्ये आधाभन्दा बढी २ वर्षमुनीका शिशुहरु भएको जनाइएको छ ।
