पोखरा—पर्वत जिल्ला अस्पतालले सेवाग्राहीलाई अस्पतालको पहुँचमा पु¥याउन ‘हेलो पर्वत अस्पताल’ सेवा सुरु गरेको छ । अस्पतालका सेवा, सुविधा तथा थप जानकारीका लागि ग्राहकलाई शुल्क नलाग्ने नम्बर १८१०५०००१४१ सुरु गरी त्यसको नाम हेलो पर्वत अस्पताल दिएको हो ।
गण्डकी प्रदेश सभा सदस्य भक्तबहादुर कुँवरले सेवा सुरु गरेका थिए । १५ शैय्याको अनुमति पाएको अस्पतालमा ६० शैय्याको सेवा दिइरहेको अस्पतालले ७ शैय्यामा डायलायसिस सेवा दिइरहेको छ । थप २ शैय्यामा मेसिन भए सेवा दिन सकिने गरी व्यवस्थापन गरिएको छ ।
अस्पतालका मेडिकल सुपरिटेन्डेन्ट डा. हेमन्त बाँस्तोलाले अस्पतालमा ‘टोल फ्री नम्बर’ राख्दा संस्था र सेवाग्राही दुबैलाई लाभ हुने तर्क गरे । यसबाट सहज सेवा र पारदर्शिता बढ्ने उनको भनाइ थियो । उनले भने,‘बिरामी भेट्न चाहेको डाक्टर, बिरामीको आवश्यकताअनुसारको सेवाबारे जानकारी दिने मुख्य उद्देश्य हो । यो टोल फ्रि नम्बर २४ सै घन्टा सुचारु हुन्छ । गाउँ—गाउँबाट बिरामी पठाउनुपर्ने अवस्थामा थप सहज हुने विश्वास गरेका छौं ।’
अस्पतालले ११ मंसिर बाट फिजियोथेरापी सेवा सुरु गरेको छ । उपकरण अभावमा हाडजोर्नीको शल्यक्रिया सुरु हुन सकेको छैन । उनले भने, ‘हामीले माथिबाट मेसिन माग गरेका छौं, आयो भने सेवा सुरु गर्छौं ।’
सेवाग्राहीलाई दिने सेवा प्रभावकारी बनाउन र अस्पताललाई ‘डिजिटल’ सेवामा आधारित बनाउन आफूहरूको प्रयास जारी रहेको अस्पताल व्यवस्थापन समितिका अध्यक्ष शंकर गिरीले बताए ।
