धनगढी—सुदूरपश्चिम प्रदेश सरकारले आर्थिक वर्ष २०८१/०८२ पाठेघरको मुखको क्यान्सर विरुद्ध ‘एचपीभी’ खोप खरिद गर्न ९० लाख रुपैयाँ विनियोजन गरेको छ । प्रदेशभित्रका स्वास्थ्य संस्थामा आवश्यक स्वास्थ्य उपकरण खरिद गर्ने सामाजिक विकास मन्त्रालयअन्तर्गतको प्रदेश स्वास्थ्य आपूर्ति व्यवस्थापन केन्द्रले उक्त बजेट कार्यन्वयन गर्नेछ ।
पाठेघरको मुखको क्यान्सर विरुद्ध ‘एचपीभी’ खोपको खरिद तथा उक्त कार्यक्रम कार्यन्वयनका लागि संघीय सरकारलाई नै खोप ग्लोबल एलायन्स फर भ्याक्सिन (गाभी)ले यस वर्षदेखि अनुदानमा दिनेछ ।
स्वास्थ्य सेवा विभाग परिवार कल्याण महाशाखा, बाल स्वास्थ्य तथा खोप शाखाका डा. विवेक कर्ण लालले आउँदो फागुन महिनाबाट देशैभर अभियानको रुपमा संचालन गर्ने तयारीमा रहेको बताए । ‘गाभीले अनुदानमा दिने खोप डिसेम्बरसम्म नेपाल आइपुग्ने र सो पश्चात देशका सबै स्वास्थ्य संस्थाबाट १०–१४ उमेर समुहका किशोरीलाई दिइनेछ,’ उनले भने ।
संघ सरकारले नै अनुदानमा ल्याइरहेको खोप किन्न विनियोजन गरिएको बजेटको विषयमा स्वास्थ्य आपूर्ति व्यवस्थापन केन्द्रका प्रमुख डा. निरज अर्यालले सो बारेमा सामाजिक विकास मन्त्रालय र अर्थ मन्त्रालयबाट जानकारी लिन अनुरोध गरे । प्रदेश सरकारको नीति तथा कार्यक्रमअनुसार नै बजेट आएकाले आफ्नो कार्यलय खरिद गर्ने निकायमात्रै भएको उनको भनाइ थियो ।
संघ सरकारले आर्थिक वर्ष २०८१/०८२ मा पाठेघरको मुखको क्यान्सर विरुद्ध खोप ‘एचपीभी’ अभियानमा १० देखि १४ वर्षका किशोरीहरु लक्षित रहेका छन् । सरकारले अगामी आर्थिक वर्षबाट उक्त खोप नियमित खोप कार्यक्रमअन्तर्गत नै संचालन गर्ने रणनीति छ ।
सामाजिक विकास मन्त्री मेघराज खड्काले आफू आएको छोटो समयमा बजेट आएको र अघिल्लो सरकारले ल्याएको बजेटमा केही परिमार्जन गर्नुपर्ने भएकाले मन्त्रालयको बजेटको विषयमा नैतिक जिम्मेवारी लिने बताए । ‘स्वास्थ्य तथा अन्य क्षेत्रको बजेटमा केही दोहोरिएको तथा अनावश्यक बजेट तथा कार्यक्रम आएको भए सच्याइने छ,’ उनले भने ।
