विराटनगर—कोशी प्रदेशको सबैभन्दा ठूलो सरकारी अस्पतालको एनआईसीयु बन्द भएको दुई वर्षभन्दा बढी समयपछि सुचारू भएको छ । शुक्रबारबाट अस्पतालको आकस्मिक कक्ष माथिको भवनमा लामो समयपछि पाँच शैय्याको एनआईसीयु सुचारु गरिएको हो ।
एनआईसीयु सेवा कोशीमा बन्द रहँदा सर्वसाधारणले चर्को शुल्क तिरेर निजी हस्पिटल गएर उपचार गर्नुपर्ने बाध्यता थियो । ठाउँ अभाव र दक्ष जनशक्ति नभएको देखाउँदैं कोशी अस्पताल प्रशासनले दुई वर्ष अघिदेखि एनआईसीयु बन्द गरेर उपकरणहरू स्टोरमा थन्काएर सेवा ठप्प पारेको थियो ।
अब एनआईसीयु सेवा सुचारु भएपछि बिरामीलाई सहजता भएको कोशी अस्पतालका कावा मेसु डा. रविनराज सिंहले बताए । थप जनशक्ति व्यवस्थापनमा ध्यान दिएर अगाडि बढने उनले बताए । ‘अहिले पनि जनशक्ति अभाव छ । विकास समितिबाट थप व्यवस्थापन गरेर एनआईसीयुलाई व्यवस्थित गरेर अगाडि लैजानेछौं,’ उनले भने ।
अस्पतालको पेडियाट्रिक वार्ड ३२ शैय्याको संचालनमा छ । अहिले संचालन गरिएको एनआईसीयुमा मेडिकल अफिसर र स्टाफ नर्स अभाव रहेको कोशी अस्पतालको पेडियाट्रिक विभागका प्रमुख डा. रामनारायण चौधरीले बताए ।
कोशीमा बालरोग विशेषज्ञ आठ जना छन् । तर, मेडिकल अफिसर र नर्सको संख्या न्यून रहेको छ । ‘ एनआईसीयुमा एउटा भेन्टिलेटरमा एक जना नर्सको आवश्यकता पर्दछ । तर, अहिले पनि बच्चा वार्डबाट नर्स ल्याएर काम चलाइएको छ,’ उनले भने, ‘भेन्टिलेटर चलाउन मेडिकल अफिसर कम्तिमा पनि तीन जना आवश्यक पर्दछ । त्यसको व्यवस्थापन अस्पतालले गर्नुपर्दछ ।’
अस्पतालमा एनआईसीयु सुचारु भएपनि भेन्टिलेटर चलाउने जनशक्तिको अभाव रहेको अस्पताल स्रोतको भनाइ छ । ‘भेन्टिलेटरमा राखिएका नवजात शिशुलाई २४ घण्टा केयर आवश्यक पर्दछ । अस्पतालमा पर्याप्तमा मात्रामा बच्चाका विशेषज्ञ चिकित्सक भएपनि मेडिकल अफिसर र नर्सको चरम अभाव रहेको छ । ‘अस्पताल प्रशासनमा जनशक्ति व्यवस्थापनमा तत्काल ध्यान दिन जरुरी रहेको छ,’ एक चिकित्सकले भने, ‘अहिले एसएनसीयु (स्पेशल न्यु वर्न केयर युनिट’ मात्रै संचालनमा आएको हो ।’
