धनगढी— सुदूरपश्चिम प्रदेश सरकारले आर्थिक वर्ष २०८१/८२ को बजेट प्रदेश सभामा पेश गरेको छ । सोमबार प्रदेश सरकारका आर्थिक मामिला मन्त्री बहादुर सिंह थापाले ३१ अर्ब ५८ करोड २८ लाख रुपैयाँको बजेट संसदमा प्रस्तुत गरेका छन् ।
बजेटमा प्रदेश सांसदको स्वास्थ्य बीमा गर्नेदेखि पोषण सुधारसम्मको विषय समेटिएका छन् । प्रदेशका जनताका लागि गुणस्तरीय स्वास्थ्य सेवा उपलब्ध गराउन प्रदेश सरकारका मातहतका स्वास्थ्य निर्देशनालय, स्वास्थ्य कार्यालयहरु, अस्पताल, आयुर्वेद चिकित्सालय, आयुर्वेद औषधालय, आयुर्वेद स्वास्थ्य केन्द्रहरुको सुदृढीकरणसँगै औषधि, उपकरण र जनशक्तिमा आवश्यक बजेट बिनियोजन गरेको अर्थमन्त्री थापाले बजेट भाषणमा उल्लेख गरे ।
बजेटमा प्रदेशअन्तर्गतका अस्पताल तथा स्थानीय तहका स्वास्थ्य चौकीलाई थप स्तरोन्नती र सुदृढीकरण गरी अस्पतालमा फिजियोथेरापी सेवा विस्तार गरीने उल्लेख गरिएको छ । यसैगरी, कल्पसन्द चिकित्सा पद्धतिको विकास र विस्तारका लागि सम्भाव्यता अध्ययन गरिने बजेटमा छ ।
सेती प्रादेशिक अस्पताल, महाकाली प्रादेशिक अस्पताल र टीकापुर अस्पताल सिकलसेल एनिमिया, थालासेमिया, हेमोफोलियाजस्ता रोगको पहिचान निदान तथा उपचार ब्यवस्थाको लागि घोरीघोरा स्वास्थ्य उपचार कार्यक्रमको लागि ३ करोड ५० लाख रुपैयाँ विनियोजन गरिएको छ ।
सेती प्रादेशिक अस्पताल, महाकाली प्रादेशिक अस्पताल र टीकापुर अस्पतालमा अटीजम डाउन सिन्ड्रोम व ौद्धिक अपाङगता भएका ब्यक्तिहरुका लागि क्लिनिक तथा परामर्श सेवाका लागि उपचारको सेवा विस्तार गरिने बजेटमा छ ।
प्रदेशभित्रका सबै अस्पतालमा निःशुल्क रक्त संचार सेवा सुचारुको लागि १ करोड रुपैयाँ बजेट विनियोजन गरिएको छ । प्रदेशसभा सदस्यहरुको स्वास्थ्य बीमा कार्यक्रमको लागि आवश्यक बजेट बिनियोजन अर्थमन्त्री थापाले बताए ।
मुख्यमन्त्री स्वास्थ्य क्षेत्र सुधार तथा पोषण सुरक्षा कार्यक्रमअन्तर्गत प्रदेशमा कुपोषण न्यूनीकरण र केश ब्यवस्थापनको लागि स्थानीय तहको समन्वय र सहकार्यमा स्वास्थ्य संस्था पोषण केन्द्र स्थापना तथा विस्तार र स्तरोन्नतीका लागि प्रदेश स्वास्थ्य निर्देशनालय अस्पताल र स्वास्थ्य कार्यालयमा पर्याप्त बजेटको व्यवस्था गरिएको बजेटमा छ ।
सेती, महाकाली, तीकापुर, प्रादेशिक आयुर्वेद चिकित्सालय तथा मातहतका स्वास्थ्य संस्थाको संगठन तथा व्यवस्थापन सर्वेक्षण र स्तरोन्तीका लागि पनि बजेट विनियोजन गरेको अर्थमन्त्री थापाले जानकारी दिए ।
अछामको बयलपाटा अस्पताललाई विशिष्टीकृत अस्पतालका रुपमा सञ्चालन गर्न र प्रदेश मातहतका ल्याउन सम्भाव्यता अध्ययन गरिनेछ बजेटमा छ । बयलपाटा अस्पतालको फोहोर व्यवस्थापन र वातावरण व्यवस्थापनका लागि ७ करोड ५० लाख रुपैयाँ विनियोजन गरिएको छ ।
बजेट कार्यक्रममा स्वास्थ्य निर्देशनालयबाट कार्यान्वयन हुने गरी बयलपाटा अस्पतालमा ट्रमा युनिट स्थापनाका लागि उपकरण खरिदका लागि ३० लाख रुपैयाँ बजेट बिनियोजन गरिएको छ । त्यसैगरी, प्रदेश सरकार र लायन्स क्लबको साझेदारीमा बयलपाटा अस्पतालमा रक्त सेवा संचालनको लागि औजार उपकरण खरिदको लागि ३५ लाख रुपैयाँ बिनियोजन गरिएको छ । यस्तै, प्रदेश स्वास्थ्य आपूर्ति केन्द्रमा बलयपाटा अस्पतालको लागि आबश्यक औषधि खरिदका लागि ३ करोड रुपैयाँ विनियोजन गरिएको छ । स्वास्थ्य कार्यालय अछाममा बयलपाटा अस्पतालको सहकार्यमा ग्रामीण स्वास्थ्य प्रर्वद्धनका लागि १ करोड बिनियोजन गरिएको छ ।
