काठमाडौं–स्वास्थ्य तथा जनसंख्या मन्त्रालयले नारायणी अस्पताल वीरगञ्जका निमित्त मेसु डा. मो. एनामुल हक वीरगञ्जकै अर्को निजी अस्पताल नारायणी सेन्ट्रल हस्पिटल प्रा.लि.मा म्यानेजर रहेको विषयमा स्पष्टीकरण सोधेको छ । मधेश प्रदेशकै सबैभन्दा ठूलो केन्द्रीय अस्पतालका प्रमुख नै निजी अस्पतालको पनि कार्यकारी पदमा हुनु स्वार्थ बाँझिने जिम्मेवारी रहेको भन्दै हेल्थआवाजले समाचार प्रकाशित गरेको थियो ।
उक्त समाचार प्रकाशित भएपछि स्वास्थ्य तथा जनसंख्या मन्त्रालयले डा. हकलाई स्पष्टीकरण सोधेको हो । मन्त्रालयका प्रशासन महाशाखा प्रमुख ऋषि आचार्यले डा. हकलाई स्पष्टीकरण सोध्ने निर्णय भएको बताए । ‘बिहीबारको मन्त्रिस्तरीय निर्णयबाट स्पष्टीकरण सोध्ने निर्णय भएअनुसार उहाँलाई स्पष्टीकरण सोध्न लागिएको हो,’ उनले भने । उनकाअनुसार डा. हक विरुद्ध निजी अस्पतालको म्यानेजर बनेको बाहेक अन्य उजुरीहरु पनि मन्त्रालयमा परेका छन् ।
डा. हक नेपाल सरकारका १० औं तहका चिकित्सकसमेत हुन् । डा. हकले जिम्मेवारी लिएको अर्को निजी नारायणी सेन्ट्रल अस्पताल सरकारी नारायणी अस्पतालबाट ५० मिटरको दूरीमा छ । सरकारी अस्पतालको कार्यकारी प्रमुखको रहेका डा. हक निजीको अस्पतालको पनि म्यानेजर रहेको प्रमाण हेल्थआवाजले प्राप्त गरेको छ ।
अस्पताल संचालक र डा. हकको मिलेमत्तोमा बोर्डमा भने अस्पतालको डाइरेक्टरमा डा. पवन पटेलको नाम उल्लेख छ । तर, गोप्य लिखित दस्तावेजहरुमा भने डा. हकलाई नै अस्पतालको सबै जिम्मेवारी हेर्ने तोकिएको थियो । डा. हक सरकारी नारायणीको मेसु हुनु अगावैदेखि सो अस्पतालमा कन्सल्ट्यान्टको बोर्ड झुण्ड्याएर काम गर्दै आएका थिए । तर, वीरगंजकै नेता प्रदीप यादव स्वास्थ्य तथा जनसंख्या मन्त्री भएर आएपछि उनलाई सरकारी नारायणी अस्पतालको मेसु नै बनाइएको तियो । ६ जेठमा मन्त्री यादवले निमित्त मेसु बनाएर ४ सय ५० शैय्याको केन्द्रीय अस्पतालको कमाण्ड सुम्पिएका थिए ।
तर, निमित्त मेसु डा. हकले त्यत्तिमै मात्र चित्त बुझाएनन् । १ साउनमा ५० मिटर दूरीमा रहेको नारायणी सेन्ट्रल अस्पताल प्रा.लि.को पनि कार्यकारी पद म्यानेजरमा लोभ देखाए । निजी अस्पताल नारायणी सेन्ट्रलका संचालकद्वय सुमन केयल र सुरेस केयलले १ साउनमा ११ जना चिकित्सक (हेड अफ डिपार्टमेन्ट)लाई साक्षी राखेर डा. हकलाई अस्पतालको सम्पूर्ण व्यवस्थापन हेर्ने जिम्मेवारी सुम्पिएका लिखित दस्तावेजहरुमा देखिन्छ ।
‘अस्पतालको सबै व्यवस्थापनको जिम्मेवारी डा. एनामुल हकको हुनेछ,’ माइन्युटमा लेखिएको छ, ‘डा. एनामुल हक पूर्णकालीन चिकित्सकहरु पनि ल्याउने छन् ।’ त्यसैगरी अन्य निर्णयमा आमा सुरक्षा कार्यक्रम संचालन नगर्ने र निवर्तमान निर्देशक डा. प्रमोदकुमार सर्राफले दिएको राजीनामा स्वीकृत गर्ने रहेको छ ।
डा. हक मेसु भएर आएसँगै ४ सय ५० शैय्या संचालन रहेको अस्पताल अस्तव्यस्त छ । मेसु नियुक्त भएको १५ दिनमा नै उनले चिकित्सक, नर्स र स्वास्थ्यकर्मी गरी ४६ जना कर्मचारी विकास समितिसँगको सल्लाह बिना नै निकालेका थिए । त्यसको ९ दिनपछि नै उनले नारायणी सेन्ट्रल अस्पतालको व्यवस्थापनको पनि जिम्मा लिएका हुन् ।
