काठमाडौं–नर्भिक अस्पतालको पूर्णकालीन मिर्गौला प्रत्यारोपण सर्जनसमेत रहेका सुर्यविनायक नगर अस्पतालका कार्यकारी निर्देशक डा. राकेश बर्माले नर्भिकसँग करार नवीकरण नगर्ने भएका छन् ।
३१ साउनमा डा. बर्माले नर्भिक अस्पताललाई पत्र लेख्दैं २ भदौंदेखि करार नवीकरण नगरिदिन भनेका हुन् । नर्भिक अस्पताल स्रोतबाट प्राप्त डा. बर्माको राजीनामा पत्रमा नर्भिकसँग आफ्नो कुनै संलग्नता नरहेको क्लियरेन्स लेटरसमेत माग गरिएको छ ।
वि.सं. २०७९ मंसिरबाट नर्भिकमा पूर्णकालीन मिर्गौला प्रत्यारोपण सर्जनका रुपमा काम गरिरहेका डा. बर्मा भक्तपुरस्थित सुर्यविनायक नगर अस्पतालको कार्यकारी निर्देशक पनि रहेको विषयमा हेल्थआवाजले समाचार प्रकाशन गरेको थियो ।
सरकारी अस्पतालको कार्यकारी निर्देशक रहेर निजी अस्पतालमा पूर्णकालीन चिकित्सक पनि भएको विषय उठेपछि नर्भिक अस्पतालको मिर्गौला प्रत्यारोपण अनुमति प्रक्रिया पनि अन्यौलमा छ ।
सरकारी अस्पतालको कार्यकारी निर्देशक भएर निजीमा पनि पूर्णकालीन चिकित्सक भएर काम गरेको भन्दै डा. बर्मामाथि सुर्यविनायक नगरपालिकाले पनि प्रश्न उठाएको थियो । नगरपालिकाले प्रश्न उठाएपछि उनले नर्भिकसँगको सम्बन्ध नरहेको पत्र बनाइदिनसमेत अनुरोध गरेका हुन् ।
डा. बर्माले करार नवीकरण नगर्नेबारेको पत्रमा भने समय अभाव र व्यक्तिगत कारण देखाइएको छ ।
नर्भिकबाट डा. बर्माको राजीनामासँगै मिर्गौला प्रत्यारोपणका लागि अब अर्को प्रत्यारोपण सर्जन खोज्नुपर्ने बाध्यता नर्भिकलाई आइपरेको छ । नर्भिकको मिर्गौला प्रत्यारोपणको अवधि यही हप्ता सकिदैंछ ।
यो पनि पढ्नुहोस्
