विराटनगर—विराटनगरको न्यूरो हस्पिटल चोकमा रहेको दिलावर फार्मेसीले सिलबन्दी गरिएको छ । आइतबार दिउँसो औषधि व्यवस्था विभाग (डिडिए) विराटनगरले दिलावर खानले संचालन गरेको फार्मेसी सिलबन्दी गरेको हो ।
उक्त फार्मेसीले बिरामीलाई खुलेआम ठगी गर्दै आएको घटना सेलाउन नपाउँदै औषधिको अनुचित प्रयोगको लागि ‘ट्रामाडोल’ इन्जेक्सन भण्डारण गरेको पाइएपछि सिलबन्दी गरिएको हो । डिडिए विराटनगरका फार्मेसी अधिकृत अनिल परियारको नेतृत्वमा आएको टोलीले अनुगमनको क्रममा जटिल किसिमको कैफियत भेटेपछि सिलबन्दी गरिएको बताएको छ ।
क्यान्सरका बिरामीको दुखाइ कम गर्न प्रयोग गरिने ट्रामाडोल दिलावर फार्मेसीमा खुल्लेआम बिक्री वितरणको लागि राखिएको पाइएपछि सिलबन्दी गरिएको हो ।
डाइसाइक्लोमाइन, ट्रामाडोल र स्पासपेन मिसाएर लागूऔषध बनाएर बिक्री वितरण हुने गरेको छ । त्यही रोक्नको लागि डिडिएले ट्रामाडोल हस्पिटलभित्रको फार्मेसीले त्यो पनि प्रत्येक बिरामीको रेकर्ड राखेर मात्रै बिक्री वितरण गरिनुपर्ने नियम लागू गरेको छ ।
कमाउ धन्दामा लागेका औषधि व्यवसायीहरुले ट्रामाडोलको चरम दुरुपयोग गर्दै लागूऔषध प्रयोगकर्ताहरुलाई पनि वितरण गरेको पाइएपछि हस्पिटल भित्रका फार्मेसीबाहेक बाहिरका औषधि पसलले विक्री वितरण गर्न नपाइने नियम लागु भएको हो । तर, डिडिएको नियमलाई खुला रुपमा चुनौती दिदैं दिलावर फार्मेसीले कुनै पनि रेकट बेगार ‘ड्रामाडोल’ इन्जेक्सन खुला रुपमा बिक्री वितरण गरेको पाइएपछि सिलबन्दी गरिएको हो । ‘अनुगमन गरेपछि ‘ड्रामाडोल’ इन्जेक्सन भेटिएपछि सिलबन्दी गरिएको हो । थप अनुसन्धानपछि औषधि ऐनअनुसार अब कारवाहीको प्रक्रिया अब अगाडि बढनेछ,’ उनले भने ।
दिलावरी फार्मेसीले केही महिना अगाडि मात्रै लग्दै नलगेको औषधि ‘प्रेस्क्रिप्सन’ मा देखाएर भारत ग्राम हरिपुर ६ का वर्ष ८० का एक बिरामीलाई ठगी गरेका थिए । दिलावर फार्मेसीले एक भाइलको १ हजार ६५० रुपैयाँ पर्ने ‘सिस्ट्रा’ इन्जेक्सन चिकित्सकले प्रेस्क्रिप्सनमा नलेखिदिएपनि बिलमा चढाएर पैसा लिने गरेको प्रमाण भेटिएको थियो ।
उक्त फार्मेसीले २८ फागुन २०८० मा चिकित्सकले लेखेको प्रेस्किृप्सनमा उल्लेख नभएको २० भाइल सिस्ट्रा इन्जेक्सन नगद बिलमा इन्ट्री गरेर ३३ हजार २४ रुपैयाँ ठगी गरेको पाइएको थियो । ठगी गरेको रकमपछि बिरामीलाई फिर्ता गरेपछि आउँदा दिनमा गल्ती नगर्ने भन्दै फार्मेसीले प्रतिवद्धता जाहेर गरेपछि कारवाहीबाट जोगिएको थियो । अहिले फेरि औषधिको अनुचित प्रयोगको लागि ‘ड्रामाडोल’ इन्जेक्सन राखिएको पाइएको छ ।
