काठमाडौं—सुर्यविनायक नगर अस्पतालका कार्यकारी निर्देशक डा. राकेश बर्मा नर्भिक अस्पतालमा फुलटाइम ट्रान्सप्लान्ट सर्जन रहेको तथ्य फेला परेको छ । हेल्थअवाजालाई प्राप्त विवरणहरुमा डा. बर्मा सुर्यविनायक नगरपालिकाको स्वामित्वमा रहेको सुर्यविनायक नगर अस्पतालमा पूर्णकालीन कार्यकारी निर्देशक हुन् ।
भक्तपुर नगरपालिकाकी उपमेयर सरिता तिम्सिना (भट्टराई)ले ७ महिनाअघिदेखि अस्पतालको कार्यकारी निर्देशकमा डा. बर्मा रहेको बताइन् । ‘७ महिनादेखि डा. बर्मा नगर अस्पतालको कार्यकारी निर्देशक हुनुहुन्छ,’ उनले भनिन्, ‘उहाँलाई फुलटाइम कार्यकारी निर्देशकका रुपमा नियुक्त गरिएको हो ।’ पालिका स्रोतकाअनुसार उनको तलब १ लाख ५० हजार रुपैयाँ र सवारी साधन र इन्धन सुविधासमेत नगरपालिकाले उपलब्ध गराउँदैं आएको छ ।
नर्भिक अस्पतालका प्रमुख कार्यकारी अधिकृत (सिईओ) अजयकुमार मिश्रले डा. बर्मा नर्भिकको पूर्णकालीन ट्रान्सप्लान्ट सर्जन रहेको बताए । ‘डा. बर्मा नर्भिक अस्पतालको पूर्णकालीन ट्रान्सप्लान्ट सर्जन हो,’ उनले भने, ‘विहान १—२ घण्टा भक्तपुरतिर कता सेवा दिनुहुन्छ भन्ने सुनेको छ ।’ मिश्रले शहीद धर्मभक्त राष्ट्रिय प्रत्यारोपण केन्द्रका निर्देशक डा. पुकारचन्द्र श्रेष्ठ पनि नर्भिकका पार्टटाइम प्रत्यारोपण सर्जन भएको जानकारी दिए ।
तस्विरः सुर्यविनायक नगर अस्पताल वेवसाइट
नर्भिक अस्पतालले मिर्गौला प्रत्यारोपण अनुमतिका लागि सरकारी निकायमा बुझाएका दस्तावेजहरुमा पनि डा. बर्मालाई नर्भिकले पूर्णकालीन युरो सर्जन रहेको देखिन्छ । तर, डा. पुकार भने नर्भिकको प्रत्यारोपण टिममा रहेको कुनै पनि सरकारलाई बुझाइएका विवरणहरुमा उल्लेख छैन ।
यस विषयमा बुझ्न हेल्थआवाजले डा. बर्मालाई पटक—पटक सम्पर्क गर्दा उनीसँग सम्पर्क हुन सकेन ।
