काठमाडौं—मोरङमा ३०० शैय्याको सुविधासम्पन्न जीवन विकास सामुदायिक अस्पताल तथा टेक्नीकल एजुकेशन फाउण्डेसन बन्ने भएको छ । कटहरी गाउँपालिका—२, हल्दीवारी—रंगेली रोडमा उक्त अस्पताल तथा टेक्नीकल एजुकेशन फाउण्डेसन बन्न लागेको हो ।
अस्पताल निर्माणका लागि वन तथा वातावरण मन्त्रालयले वातावरणी प्रभाव मुल्यांकन प्रतिवेदन (ईआईए) सार्वजनिक गरेर गत असारमै ७ दिने सुझावका लागि सूचनासमेत जारी गरिसकेको छ ।
१ लाख ११ हजार १८१.६१५ वर्गमिटर क्षेत्रफलमा स्थापना हुन लागेको उक्त अस्पतालले सामान्य आधारभूत सेवा, विशेषज्ञ सेवाहरुका साथै ठाउँ विशेषका उपचार सेवा प्रदान गर्नेछ । अस्पताल संचालन आइसकेपछि एमबीबीएस, नर्सिङ, फार्मेसी, मेडिकल प्रयोगशाला, फिजियोथेरापी, रेडियोलोजीमा स्नातक र स्नातकोत्तर तहका शैक्षिक कार्यक्रम संचालनमा ल्याउने योजना समेत बनाएको छ ।
अस्पताल तथा टेक्नीकल एजुकेशन सेन्टरका लागि बन्ने आठौं तलाको अत्याधुनिक भवनमा तीन ब्लकमा रहनेछन् । भवन ब्लक ‘ए’, ‘बी’ र ‘सी’ गरी तीन ब्लकमा निर्माण गर्ने योजना व्यवस्थापनले बनाएको छ । ब्लक ‘ए’मा भुँइ, पहिलो, दोस्रो, तेस्रो, चौथो, पाँचौ, छैठौ, सातौ तलासँगै ट्रेसर रहनेछ । यो ब्लकको क्षमता १८१ शैय्याको हुनेछ । यसैगरी, ब्लक ‘बी’ मा भुइँ, पहिलो, दोस्रो, तेस्रो तला र छत रहनेछ भने यसमा रेडियोलोजी, प्याथोलोजी विभाग, ब्लड बैक, प्रशासनिक कार्यलयलगायतका संरचना रहनेछन् ।
आठौं तला रहने ब्लक ‘सी’ १७९ शैय्या क्षमताको हुनेछ । तीन वटै ब्लकलाई प्रत्येक तलासँगै ‘कनेक्टीङ करिडोर’ले जोड्ने योजना बनाइएको छ । अस्पतालका संरचना बाल, महिला, अपांग र अशक्तमैत्री हुने उल्लेख छ ।
अस्पताल संचालनका लागि ५१६ जना नियमित कर्मचारी आवश्यक पर्ने प्रक्षेपण गरिएको छ । ३ सय शैय्याको अस्पताल संचालनमा आउँदा ४४ जना विशेषज्ञ चिकित्सक, ७२ जना मेडिकल अधिकृत, १२० जना नर्स, ३६ जना पारामेडिकल, ३ जना वरिष्ठ औषधी व्यवस्थापक, ६ जना फार्मेसी अधिकृत, १५ जना फार्मेसी सहायक रहनेछन् ।
यसैगरी, मेडिकल ल्याब टेक्नोलोजिष्ट, ल्याब टेक्नीसियन, रेडियो इमेजिङ, एनेस्थेटिक सहायक, अप्टोमेट्री विज्ञलगायत अन्य विविध विधाका गरी ७६ जना अन्य स्वास्थ्यकर्मी रहनेछन् । अस्पतालको प्रशासनतर्फ भने मेसुसहित ३५ जना रहनेछन् भने अस्पतालको सहयोग सेवाका लागि ८२ जना कर्मचारी रहनेछन् ।
२ पुस २०७६ मा कम्पनी रजिष्ट्रारको कार्यलयमा दर्ता भएको जीवन विकास सामुदायिक अस्पताल तथा टेक्नीकल एजुकेशन फाउण्डेसनले उक्त अस्पताल संचालन गर्न लागेको हो । यो संस्था मुनाफारहित, गैरसरकारी र जनहितकारी सामाजिक संस्था हुने उल्लेख छ ।
संस्थाको जनशक्तिको व्यवस्थापन, भौतिक सामाग्रीको व्यवस्थापन, बजेट तथा आर्थिक व्यवस्थापनको कार्य फाउण्डेसनको संस्थापक सदस्य जीवन विकास पब्लिक हेल्थ सेन्टरबाट गरिने जनाइएको छ । सेन्टरको प्रमुख सेयर होल्डर संस्था जीवन विकास समाज हो ।
