काठमाडौं—चिकित्साशास्त्र अध्ययन संस्थान (आईओएम) महाराजगंज मेडिकल क्याम्पसका एमबीबीएस अन्तिम वर्ष अध्ययनरत विद्यार्थी सनम महर्जन पाँच दिनदेखि सम्पर्कबिहीन रहेका छन् । आइतबार २ बजेदेखि सनम मोबाइल, पर्सलगायतका सामाग्रीहरु घरमै छोडेर सम्पर्कबिहीन भएको महाराजगन्ज मेडिकल क्याम्पसका स्ववियु सभापति आनन्द सिंहले जानकारी दिए ।
‘उहाँ आइतबार २ बजेदेखि सम्पर्कबिहीन हुनुभएको हो,’ उनले भने, ‘पर्स, मोबाइललगायतका सामाग्री घरमै छोडेर कहाँ हिड्नुभएको भन्ने परिवारको भनाइ छ । अहिलेसम्म सम्पर्क हुन सकेको छैन ।’ सनम महाराजगन्ज मेडिकल क्याम्पसका ३८ औं ब्याचका विद्यार्थी हुन् ।
सनमकी दिदी नगिना महर्जनकाअनुसार २६ वर्षीय उनी आइतबार दिउँसो कुसुन्तीको विष्णुदेवी मन्दिर क्षेत्रबाट सम्पर्कबिहीन भएका हुन् । ‘कुसुन्तीको विष्णुदेवी मन्दिर क्षेत्रबाट सम्पर्कबिहीन भएका हुन्,’ उनले भनिन्, ‘अहिलेसम्म कुनै जानकारी पाउन सकेका छैनौ ।’ उनी गोदावरी टौखेलका स्थानीयवासी हुन् ।
सनमले निलो रंगको माथिल्लो लुगा र खरानी कलरको पाइन्ट लगाएका छन् । भेट्ने व्यक्तिले उनको परिवार अथवा नजिक प्रहरी चौकीमा खबर गरिदिन पनि परिवारले आग्रह गरेको छ ।
