– श्री हस्पिटलले भनेको रकम नदिँदा बिरामी बन्धक
विराटनगर—मोरङको कानेपोखरी गाउँपालिका–३ हरकपुरका ३१ वर्षीय रञ्जित टुडु पेट दुखेपछि २८ असारमा विराटनगरस्थित कोशी अस्पतालमा उपचारको लागि आएका थिए । आर्थिक अवस्था कमजोर रहेका उनी सस्तोमा सरकारी अस्पतालमा उपचार गराउन कोशीमा आएका थिए ।
कोशीमा आएका उनलाई चिकित्सकले भिडियो एक्स–रे गर्न सुझाव दिए । एक्स–रे गर्दा उनको पेटमा समस्या देखियो । त्यसपछि चिकित्सकले आईसीयुमा राखेर उपचार गर्नुपर्ने बताए । तर, कोशीमा आईसीयु खाली थिएन । चिकित्सकले निजी हस्पिटल जान भनेपछि उनलाई आफन्तले विराट टिचिङ हस्पिटल लैजाने सल्लाह गरे । विराट जाने सल्लाहअनुसार एम्बुलेन्स लिन कोशीको गेटमा गएका थिए ।
एम्बुलेन्सका चालक रहेकामध्ये एक जनालाई सोधे, ‘विराट मेडिकल कलेज थप उपचारको लागि जानु छ, कति हो भाडा ?’ चालकले भने, ‘किन विराटमा जानुहुन्छ । सस्तो र राम्रो उपचार श्री हस्पिटलमा हुन्छ ।’ त्यसपछि उनीहरु श्री अस्पताल पुगेर उपचार सुरु भयो ।
आन्द्रामा समस्या देखिएपछि श्री हस्पिटलका सर्जन डा.अरविन्द यादवले शल्यक्रिया गर्नुपर्ने बताएका थिए । आर्थिक अवस्था नाजुक रहेका टुडुको परिवारले उपचार खर्चबारे सोधीखोजी गरेको थियो । ‘अहिले उपचार गर्दै गर्नु पछि मिलाएर गरौला’ भन्ने अस्पताल प्रशासनको कुरापछि छोराको उपचार सुरु गरेको बाबु सर्दु टुडुले बताए ।
बिरामीका बावु सर्दु टुढु छोराको उपचारका बारेमा गुनासो सुनाउँदै ।
१ साउनमा रञ्जितको पेटको शल्यक्रिया भएकोमा पाँच दिनपछि रञ्जितको उपचार खर्चको बिल हस्पिटलले थमायो । अस्पतालले ३ लाख २० हजारको रुपैयाँको बिल बनाएकोमा टुडु परिवारले १ लाख ४५ हजार रुपैयाँ बुझाएपनि थप रकम दिन सकेन् । बनिबुतो गरेर गुजारा चलाउने सुकुम्वासी टुडु परिवारले पालेको चौपाया बिक्री र ऋण खोजेर १ लाख ४५ हजार रुपैयाँ बुझाएका हुन् ।
श्री हस्पिटलले उपचार सकिएको भन्दै १ लाख ५० हजार रुपैयाँ र फार्मेसीले ५० हजार गरी थप २ लाख रुपैयाँ माग्दै आएको थियो । तर, उनीहरुसँग तिर्ने पैसा थिएन । ‘सस्तोमा उपचार हुन्छ भनेर आएको एम्बुलेन्स चालकले फसायो । यत्रो पैसा कहाँबाट तिर्नु’ भन्दै टुडु हारगुहार गर्दै आफ्नो निर्वाचन क्षेत्रका सांसददेखि प्रमुख जिल्ला अधिकारीसम्म धाइरहेका छन् ।
छोराको उपचार खर्च मिनाहा गरिदिन आग्रह गर्दै उनले हारगुहार गरेपछि १० साउनमा नै हस्पिटलले पैसा बुझाएर टुडुलाई घर लैजान भनेको थियो । तर, पैसा बुझाउन नसक्दा रञ्जितलाई घर जान दिएको थिएन । कतैबाट पार नलागेपछि टुडु परिवारले श्री हस्पिटलले छोरा बन्धक बनाएको भन्दै बुधबार दिउँसो नेपाल पत्रकार महासंघ मोरङमा पत्रकार सम्मेलन गर्ने तयारी गरेका थिए । त्यसको जानकारी पाएपछि हस्पिटलले २ लाख रुपैयाँ छुट गरिदियो ।
एम्बुलेन्स चालकले कमिसनको लोपमा परेर श्री हस्पिटल पु¥याएका बिरामी रन्जित टुढुसहित उनका परिवार ।
पत्रकार सम्मेलनको तयारीमा टुडुको परिवार संचारकर्मीलाई आफ्नो गुनासो सुनाउँदैं गर्दा अस्पतालबाट त्यही बेला फोन आएको थियो । ‘पत्रकार सम्मेलन नगर्नु बाँकी पैसा तिर्न पर्दैन् । बिरामी लैजानु’ भन्दै अस्पताल प्रशासनले फोनमा भनेपछि रञ्जितका बाबु सर्दु छक्क परेका थिए । ‘छोरालाई घर जान दिने भएपछि अब पत्रकार सम्मेलन नगरौं होला हैन सर ?,’ उनले हेल्थआवाजकर्मीसँग भने । पत्रकार सम्मेलनमार्फत खोजेको न्याय पाएपछि पत्रकार सम्मेलन नगरी उनी फर्किए ।
बिरामीलाई कमिसन पाउने लोभमा एम्बुलेन्स चालकले चर्को शुल्क लिने हस्पिटलमा पु¥याएको यो एउटा उदाहरण मात्रै हो । एम्बुलेन्स चालकलाई पनि कमिसन दिनुपर्ने भएकैले श्रीले बिरामीसँग चर्को शुल्क असुल्ने प्रयास गरेको थियो । तर, पत्रकार सम्मेलन भएर आफ्नो कर्तुत सार्वजनिक हुने भएपछि अस्पताल २ लाख रुपैयाँ छुट दिएर ब्याक भयो ।
विराटनगरको श्री हस्पिटल मात्र हैन, गोल्डेन अस्पताल, ग्रीनक्रस हस्पिटल, सञ्जीवनी हस्पिटल, लाइफगार्ड अस्पताललगायतले एम्बुलेन्स चालकलाई आफ्नो हस्पिटलमा बिरामी ल्याएबापत निश्चित रकम दिने गरेको एम्बुलेन्स चालकहरु नै बताउँछन् । ‘एम्बुलेन्स चलाएर पाउने रकमले त परिवारको गुजारा नै चल्दैन्,’ एक चालकले भने, ‘जुन अस्पतालमा गएपनि बिरामीको उपचार गराउने हो । हामीलाई पनि २÷४ हजार रुपैयाँ दिन्छन् । त्यही भएर लैजान्छौं ।’
बिरामीले आफैं कुनै अस्पतालमा जान चाहेको अवस्थामा भने त्यही अस्पतालमा बिरामी लैजाने ती चालकको दावी छ । स्रोतले दिएको जानकारीअनुसार श्रीसहितका हस्पिटलले आईसीयुमा जाने बिरामी एम्बुलेन्स चालकले ल्याएमा २० हजार रुपैयाँसम्म कमिसन दिने गरेका छन् । जनरल वार्डमा राख्नुपर्ने बिरामी आए उनीहरुको हकमा भने बिरामीको कुल उपचार खर्चमध्ये २ देखि ५ प्रतिशतसम्म एम्बुलेन्स चालकलाई दिने गरेको स्रोतको दावी छ । चालकको हिसाब महिनाको अन्तिममा हुने अस्पताल संचालकहरु बताउँछन् ।
जिल्ला प्रशासन कार्यालय मोरङका सहायक प्रमुख जिल्ला अधिकारी प्रदीप साहले बिरामीलाई ठगी गरेको उजुरी परे कारवाही हुने बताए । ‘बिरामी ठगीमा परेको भनेर प्रशासन कार्यालयमा उजुरी आए प्रहरीलाई भनेर हामी कारवाहीको दायरामा ल्याउनेछौं,’ उनले भने । एम्बुलेन्सलाई दिने गरेको कमिसनको विषयमा बुझ्न श्री हस्पिटलका प्रशासन प्रमुख सुनिल यादवलाई सम्पर्क गर्दा उनी सम्र्पकमा आउनै चाहेनन् ।
