काठमाडौं—त्रिभुवन अन्तर्राष्ट्रिय विमानस्थलबाट पोखरा उडान भर्ने क्रममा दुर्घटनामा परेको सौर्य एयरलाइन्सको ९ एन–एएमई सीआरजे २०० जहाजमा चालक दलका सदस्यसहित १९ जना रहेको पाइएको छ । बुधबार विहान ११ बजे पोखरा उडानका क्रममा टेकअपलगतै उक्त विमान दुर्घटनामा परेको थियो ।
उक्त विमानमा चालक मनिष शाक्य र कोपाइलट एस कटवालसहित १९ जना थिए । उनीहरु धेरै जना सौर्य एयरलाइन्सका कर्मचारी हुन् ।
जसमध्ये पाइलट मनिष शाक्यको जीवित उद्धार गरिएको छ । काठमाडौं उपत्यका प्रहरी कार्यलय रानीपोखरीका प्रवक्ता दिनेशराज मैनालीले उनको जीवित उद्धार गरेर काठमाडौं मेडिकल कलेज शिक्षण अस्पताल (केएमसी) सिनामंगल लगिएको छ ।
३७ वर्षीय शाक्यको अवस्था गम्भीर रहेको बताइएको छ । ‘भर्खरै बिरामी ल्याइएको छ । अहिले नै भन्न सकिने अवस्था छैन,’ केएमसीका सर्जन डा. सुमन श्रेष्ठले भने । उनी सन् २०१४ देखि सौर्य एयरलाइन्समा कार्यरत रहेका थिए ।
उद्धार गरेर दुई जनालाई त्रिवि शिक्षण अस्पतालको इमर्जेन्सीमा ल्याइएकोमा उनीहरुको पनि मृत्यु भइसकेको जानकारी प्राप्त भएको त्रिवि शिक्षण अस्पतालमा निर्देशक डा. दिनेश काफ्लेले जानकारी दिए ।
नेपाल नागरिक उड्डयन प्राधिकरण (क्यान)ले जहाजमा सवार १९ जनामध्ये एक जनाको उद्धार गरिएको र अन्य १८ जनाको शव संकलन गरिएको जनाएको छ ।
