काठमाडौं—स्वास्थ्य तथा जनसंख्या मन्त्रालयले विस्तारित अस्पताल सेवा प्रदान नगरेका संघीय अस्पतालहरुलाई विस्तारित सेवा सुरु गर्न निर्देशन दिएको छ । शुक्रबार स्वास्थ्य मन्त्रालयले एक विज्ञप्ती जारी गर्दै यथाशीघ्र विस्तारित अस्पताल सेवा प्रदान गर्न निर्देशन दिएको हो ।
स्वास्थ्य मन्त्रालयका प्रवक्ता डा. प्रकाश बुढाथोकीले जारी गरेको विज्ञप्तीमा विस्तारित सेवा सुरु गरेर मन्त्रालयलाई जानकारी दिन निर्देशन दिइएको छ । ‘विस्तारित अस्पताल सेवा प्रदान नगरेका संघीय अस्पतालहरुले विस्तारित अस्पताल सेवा कार्यक्रम सम्बन्धि कार्यविधि, २०७७ बमोजिम सेवा यथाशिघ्र सुरु गर्न गराउनुहुन र सो सेवा संचालन गरे पश्चात मन्त्रालयलाई जानकारी गराउन हुन अनुरोध छ,’ विज्ञप्तीमा छ ।
नवनियुक्त स्वास्थ्य तथा जनसंख्या मन्त्री प्रदीप पौडेलले आफू नियुक्त भएलगतै एक महिनामा सरकारी अस्पतालमा लाइन लाग्नु नपर्ने व्यवस्था गर्ने बताएका छन् । अहिले सरकारी अस्पतालमा घण्टौ लाइनमा कुनुपर्ने अवस्था छ ।
पौडेलले महिना दिनभित्र लाइन लाग्नुपर्ने अवस्था अन्त्य गर्ने घोषणा गरेकै बेला विस्तारित अस्पताल सेवा कार्यक्रम लागु गर्नका लागि मन्त्रालयले निर्देशन जारी गरेको छ ।
![](https://ap-south-1.linodeobjects.com/healthaawaj/2024/07/bigyapti-1.png)